Qeveria spanjolle tha sot se do të fillojë procesin për të vendosur sundimin e drejtpërdrejtë në Katalonjë. Në një deklaratë nga Madridi, qeveria e Kryeministrit Mariano Rajoy tha se do të aktivizojë nenin 155 të kushtetutës, një dispozitë që lejon qeverinë qendrore të pezullojë autonominë e rajonit katalanas.
Ky akt sipas Rahoit, bëhet për të rivendosur ligjshmërinë në vetëqeverisjen e Katalonjës.
Senati i Spanjës, i kontrolluar nga Partia Popullore e Kryeministrit Rajoy, duhet të votojë për të miratuar nenin 155 para se të hyjë në fuqi.
Shefi i qeverisë pritet të thërrasë një mbledhje të veçantë të kabinetit për të diskutuar se cilat masa specifike duhet të merren, duke nisur me transferimin e kompetencave nga Katalonja në Madrid.
Njoftimi erdhi pak minuta pasi presidenti katalanas Carles Puigdemont kërcënoi se rajoni mund të deklarojë zyrtarisht pavarësinë nëse qeveria spanjolle nuk angazhohet në dialog.
“Pavarësisht nga përpjekjet tona dhe vullneti ynë për dialog, fakti që përgjigjja juaj e vetme po anulon autonominë tonë, tregon se ju nuk e kuptoni problemin dhe nuk doni të flisni. Nëse qeveria spanjolle këmbëngul në shmangien e dialogut dhe vazhdimin e masave shtypëse, parlamenti katalanas do të ketë të drejtë për të votuar një deklaratë zyrtare të pavarësisë, e cila nuk u votua më 10 tetor”
Por, frika është e madhe se ndërhyrja e Madridit për vendosjen e kontrollit të drejtpërdrejtë mbi Katalonjën mund të çojë drejt trazirave në rajon.
Neni në fjalë, pjesë e Kushtetutës së vitit 1978 që çimentoi sundimin demokratik në vend pas vdekjes së diktatorit Franko, nuk është aktivizuar asnjëherë më parë.
