Spanja jep alarmin/ OBSH: Evropa, epiqendër e pandemisë
Dritaret e ylberëve janë shtuar edhe më shumë këtë të shtunë në të gjithë Italinë pasi fëmijët kanë vendosur t’i përgjigjen situatës së vështirë me shpresë dhe optimizëm.
Të vegjëlit dhe familjet e tyre të cilët po qëndrojnë në shtëpi duke zbatuar urdhrin e qeverisë, varën në ballkonet e tyre çarçafë të vizatuar me ylber dhe bashkëngjkitur shënimi “Çdo gjë do të shkojë shumë mirë!”. Edhe muzika e kënga nuk ka munguar në ballkone.
Ndërkohë Organizata Botërore e Shëndetësisë ka ftuar njerëzit në të gjithë botën t’i bashkohen sfidës së duarve të pastra.
Shefi i organziatës pranoi se kontinenti i vjetër është kthyer në epiqendrën e pandemisë dhe zbatimi i udhëzimeve është më i rëndësishëm se kurrë më parë.
TEDROS ADHANOM GHEBREYESUS
DREJTOR I PERGJITHSHEM I OBSH
“Europa tani është kthyer në epiqëndrën e pandemisë. Cdo ditë raportohen shumë më shumë raste vdekjesh dhe infektimi sesa regjistroheshin në Kinë në kulmin e shpërthimit të sëmundjes. Mesazhi ynë për të gjitha vendet është që të marrin masa agresive gjithëpërfshirëse.”
Edhe vendet e tjera të Europës po përballen me përkeqësimin e situatës. Në Spanjë numri i të vdekurve ka shkuar në 191 ndërsa 79 janë regjistruar në Francë.
Edhe në Gjermani vijon të rritet numri i të prekurve ndërsa numërohen 8 të vdekur. Greqia fqinje ka raportuar 3 të vdekur, ndërsa është rritur shqetësimi për gjendjen e refugjatëve që mbahen në kampet në ishuj. Një person në Lesbos ka rezultuar pozitiv ndaj COVID-19. Mjekët kanë bërë thirrje që të merret menjëherë situata nën kontroll pasi kushtet e vështira në kampe mund të rrezikojnë shpërthimin në masë të sëmundjes.
