Partia Demokratike akuzon Prokurorinë e Posaçme se nuk po heton siç duhet biznesmenin Ermal Beqiri, i cili është i përfshirë në dosjen e “AKSHI-t”.
Në një deklaratë për mediat, Belind Këlliçi, teksa postoi disa foto të avionëve që sipas tij i përkasin Beqirit, shprehet se ai ka fluturuar i lirë me to, ndërsa SPAK nuk ka marrë asnjë masë.
“Ermal Beqiri u arrestua teksa pilotonte avionin e tij personal, që është pikërisht ky avion që shihni në këtë foto dhe që mbart logon Soft Solution. Ky avion është në pronësi të kompanisë Fly Solution, të regjistruar nga Ermal Beqiri në Slloveni. Foto që shihni në ekran, është foto e ëebsite të kësaj kompanie”, tha Këlliçi.
Sipas opozitës, këto mjete duhet të ishin sekuestruar me kohë, por vetë Prokuroria e Posaçme ka lejuar Beqirin që të lëvizë pa pengesa kudo në Europë.
“Nëse SPAK do kishte kryer detyrën dhe do të kishte bashkëpunuar me autoritetet sllovene, kjo kompani dhe avionët e saj, do të ishin vënë nën sekuestro dhe nuk do të përdoreshin dot nga personi i shpallur në kërkim ndërkombëtar Ermal Beqiri, as për fluturimet e tij personale dhe as për transport të kush e di çfarë tjetër. Logjika është fare e thjeshtë. Është pikërisht SPAK, autoriteti që ka lejuar Ermal Beqirin të lëvizë lirshëm dhe të përdorë asetet e blera me paratë e vjedhura nga populli më i varfër në Europë”, tha Këlliçi.
Ermal Beqiri u arrestua në Francë, pas fluturimit mbi një reaktor bërthamor. Sipas mediave, ndaj tij u ngritën dyshime edhe për veprimari spinazhi.
