Në gjykimin e koncesionit të sterilizimit, SPAK kundërshtoi argumentet e mbrojtjes. Në gjykim ishte i pranishëm ish-ministri i Shëndetësisë, Ilir Beqaj, në krah të avokatit të tij, Ermal Yzeiraj, pasi fitoi të drejtën për t’u gjykuar jashtë kafazit.
“Njoftimi i akuzës është i paqartë”, ishte një nga 22 parashtrimet e mbrojtjes. Sipas prokurorit Edvin Kondili, ky qëndrim nuk është i ligjshëm në këtë moment, pasi i takon fazës së gjykimit në themel.
Avokati po ashtu kundërshtoi kontratën e prokurimit. Sipas tij, në dosjen hetimore nuk gjendet kontrata origjinale koncesionare, por ajo e Fondit të Sigurimit të Detyrueshëm të Kujdesit Shëndetësor. Këtij pretendimi, SPAK iu përgjigj:
“Kontrata origjinale nuk është gjetur në Ministrinë e Shëndetësisë dhe kjo përbën një shkelje, por është gjetur ajo e njësuar në Fondin e Sigurimit të Detyrueshëm të Kujdesit Shëndetësor. Po ashtu, është gjetur edhe kontrata e koncesionarit, që do të zbatonte projektin”, Edvin Kondili.
Ilir Beqaj, nën akuzë për vjedhje duke shpërdoruar detyrën, u vetëmbrojt duke thënë:
“Organi i akuzës pranoi që në fazën e hetimeve m’i ka cenuar hapur të drejtat e mia procedurale. Tre kërkesat e fundit i kam bërë sepse gjendem në fazën e shqyrtimit paraprak. Sot unë e kam të vështirë të bëj mbrojtjen. U bënë rreth tre vjet që merrem me këtë çështje. Sot organi i akuzës tregoi se Kodi është i pavlerë. Pavarësinë e tyre e shfrytëzojnë për të shkelur të drejtat procedurale. GJKKO-ja dhe SPAK-u e hedhin poshtë ligjin e Avokaturës së Shtetit.” Beqaj.
Për kundërshtimin e të gjitha parashtrimeve të mbrojtjes, Gjykata Antikorrupsion do të shprehet më 11 shtator.
Edhe më herët, Beqaj ka mohuar përfshirjen në krim, duke deklaruar se sterilizimi i pajisjeve kirurgjikale ishte i nevojshëm. Sipas tij, kontrata koncesionare me vlerë 100 milionë euro uli infeksionet spitalore, modernizoi instrumentet kirurgjikale dhe siguroi punësimin e rreth 250 personave.
