Përplasje për dëshminë e Dumanit, SPAK kërkojnë largimin e medias, kundërshtojnë të akuzuarit dhe avokatët

Një kërkesë e Prokurorisë së Posaçme për mbylljen e dyerve gjatë dhënies së dëshmisë së Nuredin Dumanit shkaktoi përplasje të forta në sallën e gjyqit.

Sipas prokurores Doloreza Musabelliu nëse dëshmia e bashkëpunëtorëve jepet në praninë e mediave kjo do shkaktonte dëmtimin e imazhit dhe të deklarimeve në vetvete pasi ato janë konfidenciale.

I pandehuri Petrit Qoli u shpreh  se ka një vit e gjysmë që qëndron në burg dhe dëshiron që fjala e tij të jetë transparente për mediat.

I akuzuari tjetër Adrian Uzuni tha se media duhej në sallë, pasi ndaj tij janë thënë shumë gjëra nga Nuredin Dumani që e konsideron mashtrues.

Edhe avokatët dolën kundër Prokurorisë duke u mbrojtur me faktin që dosja tashmë është nën gjykim dhe nuk ka më sekret hetimor.

Pasi dëgjoi palët, Gjykata Kundër Krimit të Organizuar e Korrupsionit vendosi që shqyrtimi të bëhet me dyer të mbyllura, derisa të dëshmojnë tre bashkëpunëtorët e drejtësisë Nuredin Dumani, Erion Alibej dhe Skerdi Tase.

Njëzëri, të pandehurit por edhe avokatët kundërshtuan kërkesën e në shenjë revolte braktisën sallën e gjyqit.

Tre të penduarit kanë zbardhur krimet të dhjetë viteve të fundit, nga atentatet, shpërthimet me eksploziv e grabitje me armë./vizionplus.tv