Prokuroria e Posame ka kaluar për gjykim dosjen ndaj kryebashkiakut të Rrogozhinës, Edison Memolla, Ai akuzohet për kryerjen e veprës penale “Korrupsioni aktiv në zgjedhje” kryer në bashkëpunim.
Gjithashtu së bashku me kryebashkiakun e Rrogozhinës do të gjykohen edhe Ndriçim Tafxhafa, i akuzuar për kryerjen e veprës penale “Korrupsioni aktiv në zgjedhje”, Blerim Xhamani, i akuzuar për kryerjen e veprave penale “Korrupsioni aktiv në zgjedhje” kryer në bashkëpunim dhe “Falsifikimi i dokumentave” kryer në bashkëpunim, si dhe Isuf Tosku, i akuzuar për kryerjen e veprës penale “Falsifikimi i dokumentave” kryer në bashkëpunim.
Memolla u vu nën hetim pasi doli në disa përgjime ku kërkonte favore për banorët që pritej të drejtonte. Tabulatet telefonike kanë zbardhur se kryebashkiaku i Rrogozhinës kërkonte të mos u ndërpritej energjia elektrike debitorëve, derisa ai të merrte drejtimin e kësaj bashkie.
Mes të tjerash, Memolla dëgjohet të komunikojë me elektricistin, të cilit i kërkon të mos ia presë energjinë elektrike një banoreje, deri në marrjen e mandatit të kryebashkiakut.