Ditën e sotme SPAK i kërkoi Kuvendit të Shqipërisë që t’i heqë imunitetin ish-kryeministrit Sali Berisha.
Këshilli i Mandateve do të mblidhet në datën 18 dhjetor 2023 për të shqyrtuar këtë kërkesë.
Lexo edhe :
Politologu Ermal Hasimja në edicionin qendror në “Vizion Plus” tha për gazetarin Aleksandër Furxhi se ngjarjet e fundit do t’i japin një nxitje aksionit opozitar.
Sipas tij, kërkesa e SPAK do të sjellë një mobilizim më të madh të demokratëve që mbështesin ish-kryeministrin Sali Berisha.
Mazhoranca do “të vuajë” më tepër nga ky mobilizim, gjykon politologu.
Intervista e plotë:
-A mund të themi nga pikëpamja e politologjisë se ky është një fund apo një hap i paralajmëruar për Berishën?
Hasimja: Në rastin e Berishës mendoj që ngjarjet e fundit i japin një lloj nxitje aksionit të tij. Unë mendoj që kjo lloj situate do sjellë një lloj angazhimi më të madh të atyre demokratëve që e mbështesin Berishën.
-Ndër vite, qëkur në Shqipëri u vendos pluralizmi politik janë një duzinë deputetësh të cilët e kanë humbur imunitetitn, që në vitin ’92 me Ilir Metën e deri në rastin e fundit, që është Arben Ahmetaj këtë vit. Edhe vetë Sali Berisha e ka humbur imunitetin pas ngjarjeve të dhunshme të ’98, por këtë herë duket se gjërat janë më serizoe kur vjen fjala për Prokurorinë. Gjithmonë kërkesat e Prokurorisë kanë rënë dhe deputetët nuk janë akuzuar në fund të fundit.
Hasimja: Kësaj radhe ka akuza, pavarësisht se duke e njohur atë që ndodh në Shqipëri, me gjithë lumin e madh të akuzave që lëshohen në Shqipëri duket se ajo e Berishës nuk ishte më prioritarja. Kur vjen puna te akuzat duhet të lihet drejtësia të bëjë punën e saj.
-Sot jemi 33 vjet pas formimi të PD dhe realisht PD është më e përçarë se kurrë më parë. Edhe vetë demokratët bëjnë një pyetje: “cila është e ardhmja në kushtet kur drejtuesi më i madh do të jetë në arrest shtëpie?”
Hasimja: Brenda një grupi politik të caktuar ngjarje të tilla nuk është se domosdoshmërisht rrezikojnë kohezionin e grupit, rrezikojnë të shkaktojnë të kundërtën. Po flas për demokratët që janë në anën e Berishës. Nuk kemi ndonjë mundësi që Basha dhe Berisha me dy grupet e tyre të bashkëpunojnë. Nuk do të prekë mobilizimin e tyre. A e prek vlerësimin që ka opinioni publik, edhe këtu kam dyshimet e mia sepse njerëzit kanë një lloj qëndrimi të caktuar për këtë çështje. Mendoj që pala që do ta vuajë më tepër do të jetë mazhoranca, sepse rrezikon të nxisë një lloj angazhimi më të madh te demokratët që e mbështesin./vizionplus.tv
