Kandidati i PD për Shkodrën, Bardh Spahia shprehet i bindur se demokratët do të fitojnë zgjedhjet e 25 prillit.
Në një lidhje direkte me edicionin qendror të lajmeve në Vizion Plus, Spahia tha se bindja e tij bazohet tek alternativa që ofron PD dhe dëshira e qytetarëve për të sjellë ndryshimin.
“Kam bindjen absolute që ne do t’i fitojmë zgjedhjet. Ne e ndiejme erën e ndryshimit, ngado, në gjithë Shqipërinë. Besimi im bazohet tek alternativa që ofron PD dhe tek takimi i vazhdueshëm që ne kemi me qytetarët. Marrëdhënia që kam me banorët e Shkodrës është një marrëdhënie besimi që forcohet ditë pas dite”.
Sa i përket mungesës së investimeve gjatë këtyre tetë viteve në Shkodër, Spahia fajësoi qeverinë Rama, për të cilën tha se qytetarët shkodranë u braktisën plotësisht nga Rilindja.
“Kemi denoncuar me forcë injorimin nga Rama të Shkodrës gjatë këtyre tetë viteve të qeverisjes së tij. Provat janë konkrete. Bashkia e Shkodrës renditet në vendin e fundit sa i përket qyteteve të Shqipërisë për nga investimet e financuara nga qeveria. Shkodra ka 21 herë më pak investime sesa Durrësi, 14 herë më pak se Korça. Kjo tregon ngelizhencë dhe injorimin e plotë që Rama dhe qeveria e tij ka bërë për Shkodrën.”
Duke iu referuar ekzekutimit të Bardhok Planajt në fshatin Dobraç, Spahia deklaroi se qytetarët e Shkodrës janë përfshirë nga ndjenja e pasigurisë.
“Situata në Shkodër nuk është aspak e qetë, sa i përket rendit dhe sigurisë, me ngjarjet kriminale të bujshme. E kam fjalë për vrasjen e një dite me parë. Ngjarje që ngjall ndjenjën e pasigurisë te banorët e Shkodrës. Dëshmon se Policia e Shtetit nuk ka kontroll në territor. Kur ndodh në kushtet e një fushate zgjedhor, kthehet në një problem serioz.”
