Janë mbajtur sot në Kosovë homazhe në nderim të Haxhi Thaçit, babait të ish-Presidentit Hashim Thaçi.
Haxhi Thaçi ndërroi jetë dy ditë më parë, 16 mars, në spital ku ndodhej i shtruar për shkak të gjendjes së tij shëndetësore, ndërsa sot do të përcillet për në banesën e fundit.
Lexo edhe :
Në homazhe morën pjesë edhe politikanë shqiptarë. Në pamundësi për të qenë vetë i pranishëm për shkak të axhendës, kryeministri Edi Rama ka dërguar në Kosovë bashkëshorten e tij, Linda Ramën. Linda Rama shoqërohej nga kryetarja e Kuvendit Elisa Spiropali, ministrinTaulant Balla dhe socialisti Gramoz Ruçi. Në fjalën e saj, bashkëshortja e kryeministrit theksoi se qëndron krah familjes Thaçi, të cilës i mungojnë dy burra, Haxhi Thaçi i cili ndërroi jetë dhe ish-Presidenti, i cili nuk u lejua nga Specialja të merrte pjesë në varrimin e të atit.
“Erdha këtu për t’i dhënë lamtumirën bacës Haxhi, me respektin më të thellë, për këtë familje të njehsuar me historinë e Kosovës falë njërit prej tre djemve të tij, Hashimit, po edhe të vëllazëruar me familjen time, përmes Hashimit.
Kjo është një ditë e trishtuar.
Dhe në këtë ditë të trishtuar jam këtu me ty, nana Hyrë, jo në këmbë të Edit, po në radhë të parë sepse e di mirë se çfarë do të thotë të jesh prind i një politikani, e posaçërisht nëna e një politikani. E kam përjetuar pranë nënës së Edit.
Dhe në këtë ditë të trishtuar jam këtu, me të gjithë familjen tuaj, të cilës sot i mungojnë dy burra.
E di edhe më mirë se çfarë do të thotë të jesh bashkëshortja e një politikani, aq më tepër e një udhëheqësi, aty ku fryjnë dhe nuk pushojnë erërat e forta. E përjetoj çdo ditë.
Por çka nuk di dot fare në këtë ditë kaq të trishtuar është se ç’do të thotë të kesh fëmijën me pushkë në dorë, duke luftuar nëpër male, apo rob të atdhedashurisë së vet diku larg, në një vend pa qiell, e për askush nuk e di se sa kohë. Duhet të jetë një ankth i pambarimtë.
Ndaj nuk më mbajti dot vendi atje në Tiranë, po desha të jem këtu sot, pranë nënës dhe gruas së Hashimit. Nënës dhe bashkëshortes së komandantit, siç i thërrasim gjithnjë dhe në shtëpi, i cili në këtë ditë ndarjeje të dhimbshme duhet të vijojë të jetë larg, në luftë.
Nuk besoj se një mungesë mund të jetë dot kaq herë më e madhe se sa prania, në një ditë si kjo. E prandaj ajo rrezaton shumë përtej këtyre mureve, si një këmbanë kujtese për dhimbjen e dhjetëra mijëra prindërve e grave të kësaj toke, po edhe sakrificën e krejt popullit të Kosovës për ta paguar çmimin e lartë të lirisë”, tha Linda Rama.
Kryetarja e Kuvendit, Elisa Spiropali në fjalimin e saj tha fjalët më të mira për të ndjerin.
Ajo tha se Haxhi Thaçi, i dha Kosovës një komandant e një luftëtar e një vizionar, kryeministrin e parë dhe presidentin e Kosovës së pavarur.
“Haxhi Thaçi ishte, jetoi dhe do të jetojë në birin dhe shëmbëlltyrën e vet, Hashim Thaçin dhe pasardhësit e tij”, tha ajo.
Kryetarja e Kuvendit shtoi se qëndrimi në Hagë i ish-presidentit dhe shokëve të tij, krerëve të Ushtrisë Çlirimtare të Kosovës, po i bën nder vetëm armikut dhe askujt tjetër.
Babai i ish-presidentit të Kosovës, do të varroset sot në orën 15:00 në Burojë të Skenderajt./vizionplus.tv
