24 marsi do të mbahet mend gjatë në Kosovë, pasi 19 vjet më parë, NATO nisi sulmet ajrore kundër Serbisë, bombardime qe zgjatën për 78 ditë me radhë.
Ne orën 19:45 të 24 marsit 1999, aeroplanët e NATO-s lëshuan bombat e para kundër pozicioneve strategjike të ushtrisë Serbe.
Urdhrin për fillimin e sulmeve ajrore e njoftoi Presidenti i atëhershëm i Shteteve të Bashkuara të Amerikës, Bill Clinton. Atë natë, ai i tha popullit amerikan, se kishte urdhëruar Aleancën Atlantike të fillonte operacionin ushtarak, si mundësia e vetme e dhënies fund të genocidit në Kosovë.
“Ne dhe Aleanca e NATO-s bëmë të gjitha përpjekjet me qëllim arritjen e një zgjidhjeje paqësore të konfliktit në Kosovë. Por presidenti Millosheviç, i cili ka shkaktuar luftëra të tmerrshme në Kroaci e në Bosnjë, ka vendosur në favor të agresionit në vend të paqes”.
Sulmet ajrore kundër forcave serbe vazhduan deri më 9 qershor me arritjen e Marrëveshjes së Kumanovës, e njohur ndryshe si kapitullimi i Millosheviç.
Nëntëmbëdhjetë vjet më pas, politikanë dhe qytetarë të Kosovës, shprehin sërish falenderim për ndërhyrjen historike.
Presidenti i Kosovës, Hashim Thaçi, shkruan në facebook se “u jemi përjetësisht mirënjohës SHBA-së, shteteve të BE-së dhe Aleancës së NATO-s, që me ndërhyrjen e tyre hapën kapitullin e çlirimit të Kosovës”.
Ndërsa kryeministri Haradinaj shkruan se “Fushata ajrore e NATO-s, që filloi më 24 mars 1999, ishte vendimtare për lirinë e popullit të Kosovës. Lavdi dhe mirënjohje e përjetshme heroizmit të grave dhe burrave të NATO-s, që u flijuan në shërbim të mbrojtjes së jetës dhe shpëtimit të një populli të tërë të pambrojtur”, shprehet Haradinaj.
Gjatë viteve 1998-1999 të luftës në Kosovë u vranë më shumë se 10 mijë kosovarë, ndërsa rreth 1 milionë të tjerë u detyruan t’i braktisin shtëpitë e tyre, për t’i shpëtuar terrorit të ushtrisë serbe.
