Gjatë javëve të fundit të vitit që lamë pas, por edhe me nisjen e vitit të ri, zërat për një qeveri teknike në Shqipëri sa vijnë e bëhen më të fortë.
Por a ka bazë logjike dhe politike ky “thashethem”, për sa kohë që Shqipëria sapo ka dalë nga zgjedhjet e reja dhe qeveria “Rama 4” ka plot 83 mandate në Parlament? Kjo ishte një nga pyetjet e bëra këtë të martë në studion e “Quo Vadis” nga moderatorja Pranvera Borakaj.
Eksperti i sigurisë, Fatjon Softa, tha se një qeveri teknike mund të krijohet vetëm në rast krize, dhe kjo do të ndodhte vetëm nëse Shqipëria, deri në qershor të këtij viti, nuk evidenton dhe nuk zgjidh problemet me sigurinë energjetike.
Sipas tij, nëse kjo nuk ndodh, vendi ynë do të izolohej dhe do të përjashtohej nga organizatat energjetike europiane, gjë që më pas mund të sillte edhe tension në vend.
“Brenda qershorit të 2026-ës, Shqipëria ose duhet t’i adresojë disa problematika të energjisë, ose rrezikon të largohet nga sistemi i energjisë. Shqipëria ka disa probleme me rrjetin e izoluar dhe me problemet teknike; këto janë elementë të sigurisë rajonale. Pa këto standarde, ti nuk mund të bëhesh pjesë e këtij rrjeti. Kjo mund të krijojë premisa, pasi ti mund të rrezikohesh me sistemin e energjisë dhe të izolohesh. Atëherë mund të ndodhë ajo që thoni ju. Kjo është epoka Trump. Ai ka nisur një lëvizje botërore për ta bërë vendin e tij më të sigurt, por edhe botën më të sigurt. Ai ka vëmendje edhe ndaj Ballkanit, ku tendencat ruse dhe kineze janë më të mëdha se kurrë. Vëmendja është përqendruar te Ballkani”, deklaroi Softa.
