Lideri i PD, Lulzim Basha ju përgjigj kryeministrit Edi Rama pas sulmeve të këtij të fundit për listën e kandidatëve të opozitës.
Sipas Ramës, ndryshimi nuk mund të vijë me figurat e vjetra të koalicionit opozitar. Por Basha këtë të premte i përmendi emrat e përfolur për lidhje me krimin dhe shtoi se ndryshimi nuk mund të vijë me ta.
“Ndryshimi që sjell Edi Rama është Çyrbja, Koka, Rraja, ky është ndryshimin që i premton Durrësit. Ndërkohë që pronat e durrsakëve tjetërsohen. Shikoni hotel Vollgën është simboli që ka ndodhur në Shqipëri në këto vite, e kanë kthyer në një luftë bandash, ku të gjithë duan të marrin ndonjë copë. Tetë viteve të vështira po i afrohet fundi, 25 prilli është ditë ndryshimi. Pas reve të zeza të këtyre viteve ka një ndryshim, jemi burra të fortë, gra të forta dhe do të sjellim ndryshimin.”
Kreu i demokratëve akuzoi socialistët se pjesë të listave ka bërë dhunuesit dhe trafikuesit e grave. Kurse ekipin e vet e quajti të mrekullueshëm.
“Përfshirja e gruas, deri më sot simbolike. Të shumta gratë që nuk janë të sigurta për jetën e tyre. Sfidat e vendit, dyfish më të rënda për gratë shqiptare. Kjo qeveri ka promovuar modelet e dhunës ndaj grave. Dhunuesit dhe trafikuesit e femrave, në listat e Ramës. Kjo qeveria promovoi modelin e trafikantit të femrave. Krenar të jem pjesë dhe drejtues i kësaj skuadre të mrekullueshme. 25 prilli, ndryshim real në punësim, në barazi, në mbrotjen e grave.”
