Skemat e subvencionimit- Fermerët përgatiten për të aplikuar

Fermerët në të gjithë vendin po përgatiten për të aplikuar në skemat e shpërndarjes së subvencioneve 2017, që janë miratuar nga qeveria në muajin shkurt.

Ekspertë të bujqësisë shpjegojnë se, udhëzimi përkatës që detajon mënyrën e aplikimit pranë Agjencisë se Zhvillimit Bujqësor dhe Rural, pritet të dalë së shpejti duke i hapur rrugë procesit.

Gjatë këtij viti, fondi i vënë në dispozicion për këtë qëllim është 1.6 miliardë lekë. Financimet adresur këtij sektori kanë ardhur gjithnjë e në rritje, pasi edhe konsiderohet si motor i rritjes ekonomike.

Skema për investimet janë per:

• rritjen e konkurrueshmërisë së produkteve për të garantuar furnizimin e qëndrueshëm të tregut;
• përmirësimin e teknologjisë së kultivimit dhe të mbrojtjes së bimëve;
• prodhimin e perimeve në ambiente të mbrojtura;
• mbarështimin e blegtorisë, bletarisë dhe akuakulturës;
• furnizimin e qëndrueshëm të tregut dhe rritjen e të ardhurave financiare për familjet e zonave rurale;
• nxitjen e investimeve në sektorin e përpunimit, ruajtjes dhe marketingut të produkteve;
• rritjen e mundësisë së fermerëve për mjete të mekanizuara;
• nxitjen e formalizimit, kooperimit dhe organizimit të shoqërive të bashkëpunimit bujqësor (SHBB).

Projektet fituese do të përzgjidhen në bazë të hartës së rajonizimit të miratuar nga Ministria e Bujqësisë.