Vatra e zjarrit në hyrje të qytetit të Laçit është shuar përfundimisht. Ministria e Mbrojtjes njofton se pas një pune të gjatë për vënien nën kontroll të flakëve, është bërë e mundur shuarja e tyre në zonën e Kurbinit.
Prej ditës së djeshme, vatrat aktive të zjarrit u përhapën me shpejtësi, ndërsa autoritetet e konsideruan si një prej situatave më të vështira me të cilën janë përballur këtë sezon.
Momentalisht, raportohet se situata është e qetë dhe po monitorihet nga punonjësit e zjarrfikëses dhe shërbimit pyjor.
Gjithashtu është bërë e mundur shuarja e një vatre zjarri pranë superstradës Milot-Lezhë. Në fshatin Treblovë, në bashkinë e Selenicës të qarkut Vlorë, zjarri është arritur të shuhet plotësisht.
Ndërkohë, forcat zjarrfikëse po punojnë për mbajtjen nën kontroll të vatrave të zjarrit në fshatin Jarua, bashkia Fier ku është shmangur rreziku për banesat. Në fshatin Sinanaj, në bashkinë Tepelenë, punohet nga terreni për izolimin e vatrës së zjarrit. Puna vijon edhe në fshatin Grazhdan, në bashkinë e Finiqit për normalizimin e vatrës pas riaktivizimit.
