Me një investim prej më shumë se 3 milionë euro, në QSUT është instaluar një teknologji e re ultramoderne në sistemin e laboratorit të analizave.
Inspektimi i këtij investimi është bërë nga kreu i qeverisë Edi Rama dhe ministrja e Shëndetësisë Ogerta Manastirliu, e cila tha se ky investim do të shtrihet në të gjitha spitalet e vendit brenda pak kohësh.
Për herë të parë vendosim një sistem të kompjuterizuar të gjithë analizave dhe përfshirja e këtij sistemi, jo vetëm në QSUT, por në të gjithë spitalet që janë përfshirë në këtë partneritet, krijon më shumë lehtësi për të çertifikuar analizat. Tashmë pacientët nuk do të kenë më nevojë të vijnë në QSUT, se QSUT i ka analizat më cilësore. I gjithë standardi është i njëjtë. Jemi duke çertifikuar laboratorët sipas standardeve ndërkombëtare. Dhe garantojmë më shumë siguri edhe për diagnostikën edhe të ndjekjes të pacientëve.
Pajisja moderne do të ndihmojë në shpejtësinë e përgjigjeve të analizave si dhe në uljen e marzhit të gabimit.
Manastirliu shtoi se ky investim do të plotësojë nevojat e pacientëve për çdo lloj analize pa qënë nevoja që t’i drejtohen privatit.
