SHBA paralajmërojnë se qeveria siriane ka në plan të kryejë një tjetër sulm më armë kimike. Sipas Shtëpisë së Bardhë, janë vënë re përgatitje të ngjashme me ato të bëra përpara sulmit të 4 prillit, ku humbën jetën dhjetëra persona, shume prej të cilëve fëmijë.
Kjo ngjarje e rëndë çoi në një sulm ajror amerikan të urdhëruar nga presidenti amerikan Donald Trump ndaj një baze ajrore siriane. Përmes një deklarate Shtëpia e Bardhe theksoi se presidenti Bashar al Assad dhe ushtria e tij do ta paguajnë shtrenjtë, nëse përsëritet një sulm me arme kimike, që do të sillte vrasje masive të civilëve. Një reagim ka ardhur edhe nga ambasadorja amerikane në Kombet e Bashkuara, Nikki Haley. Ajo deklaroi se Rusia dhe Irani, aleatët kryesorë të Assadit, do të jenë përgjegjës për çdo sulm tjetër ndaj popullit sirian.
Komentet e SHBA shihen si një paralajmërim i qartë se nëse regjimi sirian e kalon vijën e kuqe, sic ndodhi në prill, amerikanët do të përgjigjen duke përdorur forcën. Kjo do të sillte një përfshirje më të madhe të Uashingtonit në konfliktin sirian. Deri tani nuk ka pasur reagime nga qeveria siriane, ndërsa presidenti Assad gjithnjë i ka mohuar akuzat se qëndronte pas sulmit në qytetin Khan Sheikhoun.
