Ish-zbuluesi Hajro Limaj ishte i ftuar në studion e emisionit “Quo Vadis” të moderatores Pranvera Borakaj.
Ai ka zbuluar se si u arrestuan dy agjentët shqiptarë në Turqi dhe si lindi nevoja për përgatitjen e oficerëve të zbulimit në shtetin turk, me objektiv Amerikën.
Pjesë nga biseda:
Borakaj: Çfarë ju ngeli në mendje gjatë atij 3-vjeçari studimi?
Limaj: Kur vazhdoja këtë shkollë të nivelit të lartë të Zbulimit, më kërkoi drejtori i Zbulimit dhe më thotë me urdhër të ministrit të Arsimit do filloni Universitetin e Gjuhëve të Huaja për turqisht. Shkova në Universitet dhe ishin 5 elitë fëmijësh, ishte hera e parë që hapej gjuha turke në fakultet. E bëra paralelisht me shkollën e Zbulimit. Ishin vitet kur zbulimi jonë jashtë shtetit kishte prishur marrëdhëniet me zbulimin rus. Në vitet ‘70, Amerika kishte filluar të vendoste baza ushtarake në Turqi. Duke qenë se ne e kishim Amerikën objekt zbulimi, lindi problem që zbuluesit tanë, nën petkun diplomatik që ishim në Turqi të krijonin agjenturën e tyre për marrjen e informacioneve të bazave të reja amerikane dhe të mundësonin rekrutimin e oficerëve general major turk me origjinë të vjetër shqiptare. Dy agjentët që rekrutuan zbuluesit tanë në Turqi u arrestuan, njëri prej tyre u pushkatua. Dhe gjithë shtypi turk akuzonte Shqipërinë për veprimtari agjenturore kundër Tuqrisë. Ishte një situate e vështirë. Kjo lindi domosdoshmërinë që Shqipëria të përgatiste urgjentisht oficerët e zbulimit ushtarak në Turqi me objektiv Amerikën.
/vizionplus.tv
