Patatja është një nga perimet më popullore të nëntokës. Përveç përdorimit të larmishëm në kuzhinë, patatja përdoret edhe për lëkurën dhe flokët. Lëngu i patates në veçanti është i mrekullueshëm për rritjen e flokut, siç do ta mësoni në këtë artikull.
Përfitimet e lëngut të patates për rritjen e flokut
Patatja përmban vitaminat B dhe C. Ajo është gjithashtu e pasur me zink dhe hekur të cilat e ushqejnë flokun në rrënjë dhe promovojnë rritjen e tij. Lëngu i patates është shumë i mirë për pastrimin e skalpit nga zbokthi dhe parandalon rënien e flokut. Për më tepër, nëse e kombinoni me mjaltë dhe vezë, ku lëng shërben si një zbutës mjaft efikas.
Si ta përdorni lëngun e patates për rritjen e flokut
Lajeni një patate dhe qërojani lëkurën. Prijeni në copa të vogla dhe futeni në mikser deri sa të formohet një pure e butë dhe e qullët. Nëse pureja është shumë e trashë mund të shtoni pak ujë. Hiqeni purenë e patates së freskët nga mikseri dhe hidheni në një napë të pastër. Shtrydheni dhe lëngun hidheni në një gotë qelqi. Lëngun aplikojeni në pjesën e rrënjëve dhe masazhojeni kokën për 5-10 minuta.
Më pas lyeni të gjithë flokun deri në maja. Lëngun mbajeni në flokë për 15 minuta dhe më pas shpëlajeni me ujë të vakët. Më pas flokët mund t’i lani me shampo si zakonisht. Kjo kurë duhet përdorur një herë në javë.
Maskë me lëng patateje, vezë dhe mjaltë
Për këtë maskë ju nevojitet lëngu i tre patateve mesatare, një e verdhë veze dhe një lugë gjelle mjaltë. Përziejini të gjithë përbërësit mirë deri sa të formohet një maskë kremoze me të cilën duhet të lyeni flokun nga rrënja tek majat. Maskën mbajeni në kokë për 30 minuta dhe më pas shpëlajeni flokun me ujë të vakët. Më pas flokët lajini si zakonisht me shampo. Kjo maskë është shumë e mirë për flokë të thatë të cilët i ushqen në thellësi dhe ndihmon në rritjen e tyre.
Lëng patateje dhe qepe për flokun
Për këtë maskë ju nevojitet lëngu i një patateje dhe një qepe të përmasave mesatare. Lëngun e të dyja perimeve duhet ta vendosni në skalp dhe ta masazhoni atë për 5-10 minuta. Më pas, me këtë lëng duhet të lyeni flokun në të gjithë gjatësinë e tij dhe ta mbani për 15 minuta. Maska duhet përdorur një herë në javë për rritjen e flokut.
