Ky sezon turistik duket se po zhvillohet në kushte jo të zakonshme, për shkak të aksionit për lirim të hapësirave publike në të gjithë vendin, për rokadën e stafit të pushtetit lokal dhe për prishje të ndërtimeve pa leje.
Ekspertët e turizmit thonë se aksione të tilla nuk janë të mirëpritura në kulmin e sezonit turistik. Mbi të gjitha aksione të tilla duhet të shoqërohen me plane zhvillimi afatgjatë.
“Nuk duhet të na shqetësojnë disa prishje të ndërtimeve në zona turistike. Duhet të shqetësohemi për faktin se sot nuk dimë ku dhe si të ndërtojmë. A e di njeri sot se si do të zhvillohet Thethi? Po Lini në Pogradec? Asnjë nuk e di se si do të zhvillohen zonat turistike. Mungojnë planet e zhvillimit të territorit dhe kjo për mua është një paqartësi se si do të zhvillohet ky sektor në afatgjatë”, tha Besnik Vathi gjatë një interviste për emisionin E-ZONE.
Sa i përket çmimeve që ofrohen kryesisht në jug të vendit, Vathi thotë se Riviera është ende nën potencial, pra ka më pak ofertë sesa turistë.
“Me hapjen e aeroportit të Vlorës, me shtimin e numrit të turistëve me rritjen e kontratave paraprake, me shtimin e strukturave akomoduese unë mendoj se çmimet e paketave në jug të vendit do të kenë një stabilizim, apo një raport të mirë me shërbimin që ofrohet, krahasuar me pjesën tjetër të vendit”, tha Vathi.
Sipas ekspertit pavarësisht rritjes së lehtë të numrit të turistëve si 6-mujorë, nuk mund të thuhet se po zbehet interesit për të zbuluar Shqipërinë turistike.
/vizionplus.tv
