Nga viti i ardhshëm, qeveria parashikon se do të njohë vjetërsinë në punë për efekt të rritjes së pagës në dy sektorë, në shëndetësi dhe në polici.
Sadedin Fishta, kreu i Sindikatës së Policëve gjatë një interviste në Vizion Plus sqaroi se si do të përllogaritet kjo formulë për afro 12 mijë punonjës Policie dhe sa prej tyre do të përfitojnë.
“Deri tani ligji ka qenë që paguhej vetëm 25% e viteve të punës me 1 % të pagës si vjetërsi. Me ndryshimet që nisin të zbatohen vitin e ardhshëm, punonjësit e policisë që kanë mbi 25 vite punë, do t’i shtohet nga 1 % çdo vit pune. Ky ndryshim prek 25-30% të punonjësve që janë në moshat 55-60 vjeç. Është një rritje që do të ndikojë tek paga mesatare e punonjësve të policies”, tha Fishta
Paralelisht, risia e dytë që do të prekë policinë është edhe trajtimi ushqimorë, i cili do të hiqet nga janari 2026.
“Nuk do të ketë më blerje në supermarkete me kupon. Me këtë kartë pas janarit policët do të kenë mundësi të tërheqin para fizike. Bëhet fjalë për një vlerë prej 10-11 mijë lekë në muaj për çdo policë me gradë. Ne po përpiqemi që edhe punonjësit civil të përfitojë nga ky trajtim”, tha Fishta.
Sipas të dhënave nga viti që vjen paga për punonjësit e policisë do të rriten minimalisht me 4000 lekë në muaj.
/vizionplus.tv
