Shefja e Shërbimit Infektiv, Najada Çomo bëri me dije se në kujdes intensiv nuk janë vetëm njerëzit në moshë, por edhe të rinjtë. Çomo tha se kjo do të thotë që virusi nuk duhet nënvlerësuar.
“Gjatë 3-4 ditëve të fundit kemi një shtim të numrit të rasteve, pra paraqitja e 10 pacientëve në ditë për shërbim dhe për t’u hospitalizuar është shifër që duhet marrë në konsideratë. Është për t’u vlerësuar që ky shtim i rasteve shoqërohet me raste të rënduara, ku mbizotëron Tirana. Kur ke pacientë në terapi intensive do të thotë që situata është realisht për t’u tërhequr vemendja e popullatës, për shkak se është e vërtetë që është ulur vëmendja. Nuk janë vetëm moshat që janë me sëmundje kronike të shtruar në shërbimin infektiv, por aktualisht ka mosha të reja që janë në terapi intensive dhe kuptoni çdo të thotë të jesh në terapi intensive në një moshë shumë të re.”
Ajo tregoi edhe se për herë të parë një pacient 71-vjeçar ka dalë nga intubimi dhe për këtë falenderoi stafin mjekësor për punën e bërë. Deklaratat Najada Çomo i bëri gjatë një takimi që ministrja Ogerta Manastirliu pati me mjekët dhe infermierët këtë të martë.
