Të dhënat e 4 viteve tregojnë se 1 në 7 shqiptarë kanë vlera të larta të hipertensionit.
Shifrat u bënë publike nga ministrja Ogerta Manastirliu në forumin shkencorë “Kontrolli Mjekësor Bazë, në kuadër të mbulimit shëndetësor universal”, që u zhvillua nga Ministria e Shëndetësisë dhe ISHP, në kuadër të Ditës Botërore të Hipeertensionit.
Manastirliu nënvizoi se në 4 vite janë më shumë se 90 mijë qytetarë që janë referuar për vizita të specializuara, pas rezultateve që ka prodhuar kontrolli mjekësor bazë.
“Sot pas 4 vitesh, të dhënat tregojnë se 1 në 7 persona ka vlera mbi normat të hipertensionit; 1 në 4 qytetarë rezultojnë me kolesterol të lartë, pra kanë rrezik të lartë për tu prekur nga sëmundjet e zemrës; 1 në 6 raste ka rezultuar me vlera më të larta të glicemisë, që orjenton për sëmundje të diabetit; 1 në 30 qytetare ka probleme me konsumin e lartë të alkoolit”, u shpreh Ministrja.
Manastirliu njoftoi gjithashtu se më shumë se 73 mijë qytetarë janë në fazën e parë të prekjes nga diabeti.
“Kontrolli mjekësor bazë ka zbuluar më shumë se 73 mijë qytetarë në fazën prediabetike. Kapja e hershme e diabetit do të thotë që të kesh mundësi ta parandalosh sëmundjen nëpërmjet sitlit të jetës, dietës të shëndetëshme dhe pa patur nevojë për t’u trajtuar me medikamente”.
Gjatë forumit, Manasttirliu iu përgjigj edhe akuzave të opozitës në lidhje me këtë program.
“Akuza të pavërteta, të artikuluara nga goja e atyre që kanë dashur të hedhin baltë mbi këtë program kaq të vlefshëm. Ne nuk bëjmë politikë me sëmundjen dhe shëndetin, ne bëjmë politika për shëndetin. Pas 4 vitesh të realizimit të këtij programi, kontrollet që kanë realizuar qytetarët janë përgjigja më e mirë për akuza të pabaza. Shpenzimet për shëndetin nuk janë kosto, janë investime”, tha Manastirliu.
