Kombëtarja shqiptare luan këtë të premte ndeshjen e madhe dhe vendimtare me Anglinë në “Uembli”.
Dueli i vlefshëm për kualifikueset e Katar 2022 ka bërë që djemtë kuqezi të besojnë fort tek ëndrra e madhe, pavarësisht vështirësisë që kjo ndeshje ka. Skuadra në drejtimin e Edi Rejës zhvilloi seancën e dytë stërvitore me ngarkesë të plotë, ku këtë herë pjesë e grupit ishin dhe dy lojtarët e sapokthyer Marash Kumbulla dhe Bekim Balaj.
Lajme të mira ka edhe nga infermieria. Gardiani Tomas Strakosha ka lënë pas lëndimin në gju dhe është kthyer në dispozicion të trajnerit.
Çështja Broja mbetet delikatë në kampin kuqezi. Lojtari i Sauthemptonit pritej të mbërrinte këtë të marte por, për shkak të një shqetësimi të vazhdueshëm në kavilje, sulmuesi do të mungojë këto dy ndeshje. Këtë e konfirmoi mbrojtësi Frederik Veseli në konferencën për shtyp, kur nënvizoi se listës së mungesave përveç Gjimshitit, Manaj dhe Balliut i shtohet dhe Broja.
Ndeshja Angli-Shqipëri pritet të oshëtijë nga tifozët, pasi sipas vendimit të fundit të autoriteteve britanike, “Uembli”, do të jetë i hapur me kapacitet të plotë prej 87 mijë vendesh dhe nga ajo çfarë raportojnë mediat vendase të gjitha biletat janë shitur.
Dueli luhet këtë të premten në orën 20:45 në Londër, ndërsa tre ditë më vonë kombëtarja kthehet në Shqipëri për të zhvilluar ndeshjen e fundit me Andorrën.
Aktualisht, Shqipëria gjendet në vendin e tretë në grupin I, me 15 pikë, 2 më pak se Polonia e vendit të dytë.
