Shqipëria magjeps francezët, Rama: Rezervimet u rriten me 288.2%
Kryeministri Edi Rama ka ndarë në rrjetet sociale një artikull të medias franceze BFM Business, që i kushtohet rritjes së interesit të turistëve francezë për Shqipërinë.
“Shqipëria gjithnjë e më e pëlqyer për francezët”, shkruan Rama, duke theksuar se rezervimet nga Franca drejt Shqipërisë janë rritur me 288.2% brenda një viti.
Në artikullin e BFM Business, kjo rritje lidhet me çmimet relativisht të përballueshme, shtimin e lidhjeve ajrore dhe përmirësimin e infrastrukturës, por edhe me peizazhet natyrore dhe turizmin bregdetar të Shqipërisë.
Artikulli veçon Rivierën Shqiptare dhe Ksamilin, por thekson se vendi ofron edhe destinacione malore dhe pasuri kulturore. Sipas të dhënave të përmendura në artikull, Shqipëria priti mbi 12 milionë vizitorë ndërkombëtarë në vitin 2025.
Rama e ka shoqëruar postimin me artikullin e BFM Business, duke e paraqitur rritjen e turistëve francezë si një tregues të interesit në rritje për Shqipërinë si destinacion turistik.
Artikulli i plotë
Po sikur të vendosnit ta vizitonit Shqipërinë për pushimet tuaja të radhës?
Në fakt, këtë zgjedhje bënë shumë udhëtarë francezë këtë verë. Rezervimet nga Franca drejt Shqipërisë u rritën me 288,2% krahasuar me vitin e kaluar. Ky bum turistik është një përfitim i madh për ekonominë shqiptare. Në vitin 2025, vendi priti mbi 12 milionë vizitorë ndërkombëtarë.
Por, si u bë kaq popullor ky vend i vogël ballkanik?
Faktori i parë është: Çmimi.
Krahasuar me destinacione si Greqia, Italia apo Kroacia, Shqipëria mbetet relativisht e përballueshme, qoftë për akomodim apo edhe për sa i përket ushqimit. Një vakt në një restorant ekonomik kushton rreth 8 euro në Shqipëri, krahasuar me 12 euro në Kroaci, 15 në Greqi dhe 17 në Itali. Dhe në faqet e internetit për rezervime, çmimi i një dhome për dy net mezi arrin në 100 euro.
Gjithashtu, mbi të gjitha, Shqipëria është bërë shumë më e aksesueshme. Lidhjet ajrore me Tiranën janë shtuar ndjeshëm, veçanërisht linjat ajrore low-cost.
Në terren, përmirësimi gradual i infrastrukturës e bën gjithashtu më të lehtë lëvizjen. Ajo që dikur ishte një destinacion jashtë rrugëve të zakonshme turistike, tani po shndërrohet në një alternativë të thjeshtë dhe të aksesueshme për pushime në Europe.
Faktori i dytë: Peizazhi.
Me ujëra në ngjyrë turkezë, male dhe fshatra të gurtë në kodra, Shqipëria ofron peizazhe të larmishme. Në rrjetet sociale, është Riviera Shqiptare ajo që vërtet tërheq vëmendjen dhe imagjinatën më së shumti.
Duke filluar me Ksamilin, i famshëm për plazhet dhe ishujt e tij të vegjël.
Por, Shqipëria ofron më shumë sesa thjesht plazhe; vendi i magjeps vizitorët edhe me peizazhet malore dhe trashëgiminë kulturore. Për ta menaxhuar këtë rritje, Shqipëria ka zbatuar
“Strategjinë Kombëtare të Turizmit 2030” që nga viti 2024. Ajo synon të rrisë të ardhurat nga turizmi, të përmirësojë infrastrukturën hoteliere dhe të mbrojë mjedisin natyror nga rreziqet e mbipopullimit turistik.
View this post on Instagram
