Përfaqësues të politikës në Shqipëri morën pjesë në samitin ndërkombëtar online me titull “Samit Trans-Atlantik mbi Politikën ndaj Iranit, Koha për t’i Kërkuar Llogari Regjimit Iranian”. Pjesë e tij ishin ministri i Diasporës, Pandeli Majko, ish-ministrja e Integrimit, Klajda Gjosha dhe ish-ministri i Mbrojtjes, Fatmir Mediu. Majko tha se Irani ka kthyer Lindjen e Mesme në fushëbetejë dhe se duhet bërë kujdes.
“Irani e ka kthyer Lindjen e Mesme në një fushëbetejë. Situata e përkeqësuar ekonomike në Iran mund të ketë pasoja. Në këtë situatë, duhet të jemi të kujdesshëm dhe të përgatitur. Është e qartë se çdo boshllëk i lënë nga Perëndimi do të mbushet nga Irani. Kjo mund ta ngrejë statusin e Iranit në Lindjen e Mesme. MEK dhe zonja Rajavi janë një alternativë për paqen mes Lindjes dhe Perëndimit. Mbijetesa e tyre sjell shpresë jo vetëm për njerëzit në Iran por edhe për marrëdhënien midis Lindjes dhe Perëndimit. Ne kemi ndihmuar MEK-un, por kemi ndihmuar edhe veten. Jemi të nderuar që jemi konsideruar si një shtëpi e dytë për opozitën e Iranit.”
Kurse Mediu nga ana tjetër vlerësoi ndihmën e dhënë nga Shqipëria për popullin iranian. Ai shtoi se duhet të mendohet për një zgjidhje në të ardhmen, me qëllim që çdo qytetar të gëzojë të drejtat e tij.
“Është bekim t’ju kemi në vendin tonë. Ju jeni frymëzim për të gjithë ne. Faleminderit që na keni dhënë familje e miq nga e gjithë bota. Duhet të mendojmë më shumë se çfarë mund të bëjmë në të ardhmen. Liria është e drejta e çdo individi e kombi, duke përfshirë Iranin. Duhet të qëndrojmë e të punojmë së bashku për t’i kërkuar llogari regjimit. OKB është një organizatë kombesh, e krijuar për të ndihmuar njerëzit. Ata duhet të vendosin se si mund ta ndihmojnë popullin iranian. Njerëzit duan jetë dhe liri, jo bomba bërthamore. Regjimi po i masakron njerëzit. Duhet të mendojmë se çfarë mund të bëjmë për këtë. Populli iranian është kundër terrorizmit. Është e rëndësishme që të gjithë ta dinë se çfarë po bën regjimi iranian në Shqipëri, në Lindjen e Mesme dhe në botë. Është koha të ngrihemi për atë që është e drejtë. Regjimi nuk do t’ia dijë për ekonominë dhe popullin e Iranit, pasi ai mendon vetëm për kapacitetet e tij ushtarake. Regjimi po kërkon aleatë të tjerë nëpër botë. Është e rëndësishme që të gjitha shtetet të qëndrojnë bashkë dhe të gjejnë një zgjidhje e cila mund ta ndihmojë Rezistencën Iraniane.”
Klajda Gjosha nga ana tjetër kërkoi të merren masa menjëherë kundër regjimit iranian.
“Është e papranueshme ajo që po ndodh në Iran, torturat dhe ekzekutimet. E mbështes vërtet atë që zonja Rajavi po bën për popullin e Iranit. Është koha që komuniteti ndërkombëtar t’i përgjigjet me masa konkrete këtij regjimi, i cili është një rrezik i vërtetë për rajonin dhe botën. I bëjmë thirrje botës që të hetojë masakrën e 1988-ës. Është nevoja t’i jepet fund pandëshkueshmërisë. Komuniteti ndërkombëtar duhet të veprojë gjithashtu për t’i dhënë fund ekzekutimeve në Iran. Ndryshimi i regjimit është e vetmja shpresë për popullin iranian që të jetojë në liri. Irani është një vend i mrekullueshëm që meriton një qeveri e cila të punojë për popullin.”
