Shqipëria humbet 1-3 me Ukrainën

Shqipëria humbet miqësoren me Ukrainën në shifrat 3-1. Në testin e vërtetë përpara debutimit në Europian, djemtë e De Biasit dorëzohen përballë ukrainasve, duke lënë shumë pikëpyetje për debutimin me Zvicrën. Me Sadikun në majën e sulmit, pjesa tjetër e formacionit ishin më të mirët dhe pjesa e parë flet për kuqezinjtë. Megjithatë janë ukrainasit ata që kalojnë të parët në avanatazh në stadiumin e Bergamos me Stepanenkon në minutën e 8-të. Ishte Armando Sadiku i cili shpërbleu me gol besimin e trajnerit, duke bërë që të shpërthejnë në festë mijëra tifozët e pranishëm në stadium. Goli i bukur i sulmuesit, por edhe rastet e tjera të krijuar, nuk ndryshuan rezultatin e pjesë së parë. Ukrainasit e fillojnë me gol pjesën e dytë pasi shënon Jarmolenko. Lenjani i shkon afër barazimit, por shtylla bëhet pengesë. De Biasi bën ndryshime dhe hedh në fushë edhe të gjithë sulmuesit Balaj, Çikalleshi dhe Gashi, por pa rezultat. Tre minuta nga fundi, ukrainasit shënojnë edhe një tjetër gol me Konopjanka, duke fiksuar rezultatin përfundimtar Shqipëria 1 dhe Ukraina 3.