Qeveria ka miratuar tre vendime në fushën e shëndetësisë, të cilat sipas Ministres së Shëndetësisë dhe Mirëqenies Sociale, Evis Sala, do të kenë ndikim të drejtpërdrejtë në jetën e qytetarëve. Vendimi kryesor parashikon krijimin, për herë të parë në Shqipëri, të Institutit Kombëtar të Tumoreve, i ndërtuar sipas modeleve evropiane, ndërsa dy vendimet e tjera lidhen me zgjerimin e shërbimit falas të Check-up-it për të gjithë qytetarët mbi 35 vjeç dhe kalimin nën administrimin e shtetit të shërbimeve të Check-up-it dhe dializës.
Ministrja Sala: Sapo miratuam tre vendime të rëndësishme. Vendimi i parë është historik, Shqipëria për herë të parë do të ketë një Institut Kombëtar të Tumoreve sipas modeleve evropiane. Kemmi marrë si shembull modelin e Institutit Kombëtar të Tumoreve të Milanos. Ky Institut do të ketë tre fusha veprimi, fushën klinike, kimioterapisë dhe radio terapisë, fushën e mësimdhënies dhe fushën kërkimore-shkencore, e para e këtij lloji në Shqipëri. Instituti do të shërbejë si bërthamë për koordinimin e punës së rrjetit onkologjik kombëtar. Instituti do të angazhohet me formimin, edukimin e specialistëve në fushën e onkologjisë. Po nis puna për ndërtimin e stukturës dhe funksionimin e këtij instituti.
Sot morëm dhe dy vendime të tjera, njëri prej tyre në fushën e parandalimit. Për herë të parë hiqet tavani moshor për shërbimin e Check-Up. Çdo qytetari mbi 35 vjeç, i ofrohet shërbimi i Check-Up falas. Gjithashtu shërbimi i Check-Up dhe dializës, merren në dorëzim dhe ofrohen nga shteti. Janë tre vendimet që ndikojnë në mënyrë direkte me një impakt të thellë në jetën e qytetarëve
