Shqipëria dhuroi të mërkurën 1 milion euro (1.06 milion dollarë) për fushatën e re të Turqisë për viktimat e tërmetit të quajtur ‘Türkiye One Heart’ (Turqia, një zemër).
Kompani, institucione, organizata dhe individë të ndryshëm kanë bërë donacione për fushatën nëpërmjet një transmetimi të përbashkët të drejtpërdrejtë përmes 200 stacioneve televizive dhe 500 radiove.
Lajmin e ka bërë të ditur kryeministri Rama i cili u shpreh i nderuar që u bë pjesë e fushatës sensibilizuese televizive “Turqia, një zemër”.
Duke iu drejtuar kombit turk si zëri i Shqipërisë, Rama shprehu keqardhjen për atë që ndodhi që ndodhi në Turqi.
”Ne jemi një vend i vogël, por kemi një zemër të madhe. Nuk do ta harrojmë kurrë atë që Turqia dhe Presidenti (Recep Tayyip) Erdogan bënë për ne në vitin 2019, kur tërmeti goditi Shqipërinë. Ne jemi të gatshëm të bëjmë çmos për të mbështetur popullin turk. Jam i sigurt se falë përpjekjeve të Turqisë, gjithçka do të arrihet”, tha ai.
Shqipëria dhe Maqedonia e Veriut shënuan të hënën një ditë zie kombëtare për tërmetet shkatërruese të javës së kaluar në Turqi dhe Siri.
Flamujt në institucionet shtetërore dhe vendet publike u ulën në gjysmë shtizë gjatë gjithë ditës së zisë të shpallur nga dy qeveritë.
Shqipëria ishte ndër vendet e para që i dha mbështetjen e saj Turqisë pas tërmeteve të 6 shkurtit.
Donacionet e mbledhura përmes fushatës do t’i dërgohen Presidencës së Menaxhimit të Fatkeqësive dhe Emergjencave të Turqisë (AFAD) dhe Shoqatës së Gjysmëhënës së Kuqe Turke. Fushata është në vazhdim.
Të paktën 35,418 njerëz janë vrarë dhe 105,505 janë plagosur në tërmetet që tronditën Turqinë jugore javën e kaluar, sipas shifrave të fundit.
