Pas dështimit të dy përpjekjeve për konstituimin e Kuvendit të Kosovës, një marrëveshje mes Lëvizjes Vetëvendosje dhe LDK-së duket se mund të jetë më pranë. Ushtruesja e detyrës së presidentes, Albulena Haxhiu, shprehet optimiste se gjatë javës së ardhshme mund të arrihet një dakordësi politike që do t’i hapte rrugë zhbllokimit të institucioneve.
“Jam optimiste që do të kemi rezultate pozitive dhe presim që kjo të konfirmohet nga Lëvizja Vetëvendosje, përkatësisht nga kryetari i Vetëvendosjes, kryeministri Albin Kurti dhe në anën tjetër kryetari i LDK-së, zoti Lumir Abdixhiku”, tha Albulena Haxhiu, ushtruesja e detyrës së presidentes
Haxhiu kërkoi që marrëveshja të përmbyllet sa më shpejt, duke e konsideruar zgjidhjen e ngërçit politik si të domosdoshme për funksionimin e institucioneve dhe vijimin e proceseve integruese të Kosovës.
“Uroj që marrëveshja të përmbyllet sa më parë, për shkak se është shumë e rëndësishme që të ecin përpara, duke pasur parasysh përgjegjësinë që kemi, reformat që duhet të vazhdojnë, por edhe obligimet që kemi, sidomos në rrugën tonë drejt anëtarësimit në Bashkimin Evropian, Këshillin e Evropës, në NATO, por edhe në shumë mekanizma të tjerë. Prandaj, le të shpresojmë që kjo javë që po vjen të jetë vendimtare për procesin e ardhshëm”, shtoi Haxhiu.
Deklaratat vijnë një ditë pas takimit mes kryetarit të Vetëvendosjes, Albin Kurti, dhe kreut të LDK-së, Lumir Abdixhiku. Pas takimit, Kurti la të kuptohej se palët ende nuk kanë gjetur një emër konsensual për drejtimin e Kuvendit.
Parlamenti vijon të mbetet i pakonstituuar, ndërsa partitë parlamentare janë përfshirë në një përplasje politike që po zgjat formimin e institucioneve të reja. PDK dhe Aleanca kanë kërkuar vijimin e seancës konstituive, ndërsa Vetëvendosje dhe LDK po përpiqen të gjejnë një formulë marrëveshjeje për të kapërcyer ngërçin.
