Shpërthim gazi në një hotel, bilanc tragjik

Të paktën 32 persona kanë vdekur, ndërsa më shumë se 19 të tjerë konsiderohen të zhdukur si pasojë e një shpërthimi të fuqishëm gazi që ndodhi në një prej hoteleve më të famshëm të Havanës në Kubë.

Në mesin e viktimave raportohet të jenë 4 fëmijë dhe një grua shtatzënë.

Hoteli “Saratoga” ishte duke u përgatitur për rihapje pas periudhës së pandemisë së koronavirusit, por tashmë është shkatërruar pothuajse plotësisht nga shpërthimi i fortë.

Incidenti ka dëmtuar rëndë edhe dy ndërtesa banimi ndërsa zjarri ka prekur edhe ndërtesat e tjera përreth.

Autoritetet kanë kryer operacionet e kërkim-shpëtimit nën rrënoja, pasi besohet se në bodrumin e ndërtesës historike,mund të ketë ende të mbijetuar.

Hoteli u ndërtua në fund të shekullit të 19-të dhe për shumë kohë ka qenë një nga objektet më të rëndësishëm në Havana.