Vullkani Fuego në Guatemalë ka hyrë në një fazë intensive shpërthimi, duke detyruar autoritetet të evakuojnë qindra banorë nga zonat përreth. Aktiviteti vullkanik ka nisur të hënën dhe vazhdon me nxjerrje llave dhe re të mëdha hiri.
Sipas autoriteteve, të paktën 1,699 persona janë larguar nga banesat e tyre për shkak të rrezikut nga rrjedhat piroklastike që zbresin përgjatë kanaleve dhe shpatet e vullkanit. Fuego ndodhet rreth 50 kilometra në jugperëndim të kryeqytetit Guatemala City.
Drejtori i Institutit Kombëtar të Sizmologjisë, Vullkanologjisë, Meteorologjisë dhe Hidrologjisë, Edwin Rojas, deklaroi se vullkani ndodhet në një “fazë kritike shpërthyese”. Hiri vullkanik është përhapur deri në 120 kilometra larg, duke arritur lartësi mbi 5 mijë metra mbi nivelin e detit.
Agjencia Kombëtare për Menaxhimin e Fatkeqësive (Conred) bëri të ditur se më shumë se 29 mijë persona janë prekur nga reshjet e hirit. Autoritetet kanë lëshuar gjithashtu paralajmërime për aviacionin, pasi hiri ka ndikuar në hapësirën ajrore në drejtim të perëndimit dhe jugperëndimit të vullkanit.
Tre rajone kanë shpallur nivelin më të lartë të alarmit dhe po bëjnë thirrje për më shumë evakuime. Disa banorë kanë hezituar të largohen nga shtëpitë e tyre për shkak të frikës nga grabitjet, ndërsa forcat e sigurisë janë angazhuar për patrullime në zonat e prekura.
Deri tani nuk janë raportuar dëme në banesa apo rrjedhje llave drejt zonave të banuara, por 18 komunitete janë prekur nga tymi dhe hiri. Mësimi është pezulluar në disa zona, ndërsa aktivitetet turistike pranë vullkaneve Fuego dhe Acatenango janë ndaluar përkohësisht. Autoritetet do të vijojnë monitorimin e aktivitetit vullkanik gjatë 72 orëve të ardhshme.
/vizionplus.tv
