Seksioni kundër Narkotikëve në Drejtorinë Vendore të Policisë Shkodër ka finalizuar me sukses oepracionin “Club”, nga ku është arrestuar një 24 vjeçar si dhe është sekuestruar lëndë narkotike e lloijt kokainë.
Operacioni është shtrirë në lokalet e natës në Qarkun e Shkodrës si rrjedhojë e informacioneve të marra në rrugë operative lidhur me disa shtetas që shpërndanin lëndë narkotike.
Si rezultat i veprimeve hetimore u arrestua në flagrancë shtetasi S. R. 24 vjeç, banues në lagjen Perash, Shkodër.
Arrestimi tij u bë pasi është kapur në flagrancë duke i shitur disa personave të tjerë lëndë narkotike kokainë. Gjatë kontrollit të këtij shtetasi rezultoi se posedonte me vete tri qese të vogla me kokainë.
Nga veprimet e kryera janë sekuestruar po ashtu 6 aparate celulare, një sasi kartëmonedhash shqiptare me vlerën 122 900 lekë të reja, 10 euro, 50 paund i dyshuar i falsifikuar, 5 karta identiteti, 2 leje drejtimi shqiptare, 1 leje drejtimi ltaliane, 4 qese për përdorimin të lëndëve narkotike, dokumente automjeti, 3 ora dore dhe dy varëse, të cilat ishin lënë nga blerësit e lëndës narkotike, si dhe një letër me formula për prodhimin e lëndëve narkotike kokainë.
Ndërkohë vijon puna me intensitet për identifikimin dhe kapjen e bashkëpunëtorëve të tjerë.
Materialet iu referuan Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikëve, e kryer në bashkëpunim” dhe “Falsifikimi i monedhave”.
