20 persona kanë rënë në prangat e policisë së kryeqytetit, pasi shpërndanin lëndë narkotike pranë shkollave dhe ambienteve që frekuentohen nga të rinjtë. Ndërkohë që 4 të tjerë janë shpallur në kërkim.
Zyrtarë të policisë kanë përfunduar operacionin e koduar me emrin “Harta”, që u finalizua me shkatërrimin e dy grupeve, që merren me shitje e lëndëve narkotike.
Gjatë operacionit janë sekuestruar 2 kg kokainë, 300 doza kanabis, 130 doza heroinë si dhe një shumë parash, 11 automjete dhe 29 aparate celularë.
“Nga hetimet ka rezultuar se këta shtetas në bashkëpunim me njëri-tjetrin vepronin të ndarë në grupe të vogla dhe shpërndanin lëndë narkotike në zona të ndryshme të Tiranës dhe Kamzës, afër shkollave, lokaleve të natës e ambienteve të tjera të frekuentuara nga të rinjtë. Po nga hetimet rezulton se prestarët e këtyre grupeve kriminale përdornin mesazhe të koduara dhe kryesisht qarkullonin me automjete të transportit publik për të shmangur kontrollet e befasishme të Policisë”, u shpreh Tonin Vocaj drejtor i policisë së Tiranës
Sipas të dhënave të policisë personat e arrestuar ishin të organizuar në dy grupe, ndërsa ata ishin nën vëzhgim pre tre muajsh.
“Pas një hetimi tremujor, me metoda speciale të hetimit nga Specialistët për Hetimin e Narkotikëve në Drejtorinë Vendore të Policisë Tiranë nën drejtimin e Prokurorisë Tiranë, u siguruan prova ligjore për dokumentonin e veprimtarisë kriminale të dy grupeve që përbëheshin nga 24 persona”, u tha në deklaratë.
Sipas kreut të policisë tiranë, gjatë 3 muajve të parë të këtij viti janë finalizuar 5 aksione në bashkëpunim me Prokurorinë dhe janë sekuestruar mbi 6 kilogramë kokainë e heroinë dhe rreth 80 kilogramë kanabis, si dhe janë vënë në pranga mbi 20 persona .