Monika Kryemadhi është paraqitur në SPAK ditën e sotme e shoqëruar nga vajza e saj.
E pyetur nga gazetarët për arsyen pse ka shkuar në SPAK, Kryemadhi u përgjigj se “do të marrë dosjen”, për të cilën akuzohet.
“Jo, nuk jam për detyrimin. Do marr dosjen”, tha ajo.
Ditën e nesërme, 19 nëqntor, do të mbahet seanca në Apelin e GJKKO, në lidhje me ankimimin e masës së dhënë nga shkalla e parë ndaj saj, teksa Kryemadhi ka kërkuar që të lexojë fashikujt e dosjes së SPAK.
Më 21 tetor, kryetari i Partisë së Lirisë, Ilir Meta u arrestua me urdhër të SPAK , nën dyshimet për “korrupsion, pastrim parash, mosdeklarim dhe fshehje të pasurisë”.
Ndërsa ndaj Kryemadhit, SPAK vendosi masën e sigurisë “detyrim paraqitje”.
Sipas SPAK, Kryemadhi është e dyshuar për kryerjen e veprave penale “Korrupsioni pasiv i funksionarëve të lartë shtetërorë ose të zgjedhurve vendorë” në 2 (dy) raste dhe në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi që ka detyrimin ligjor për deklarim”./vizionplus.tv
