Ministri për Europën dhe Punët e Jashtme, Igli Hasani, mbajti fjalën e tij në takimin e Këshillit Ministror të OSBE. Ai vuri theksin tek zhvillimet në Lindjen e Mesme, për të cilat u shpreh se duhet konsensus dhe bashkëpunim i zgjeruar i OSBE.
“Kjo luftë tragjike ka pasur pasoja dramatike për OSBE-në, në të tre dimensionet. Duke keqpërdorur mekanizmin unik të bashkëpunimit tonë – konsensusin – dhe duke e bllokuar atë për të gjitha vendimet e rëndësishme, Rusia ka synuar të dobësojë dhe paralizojë organizatën tonë.
Zhvillimet në Afganistan, ose në Lindjen e Mesme, theksojnë sërisht domosdoshmërinë e angazhimit të zgjeruar të OSBE-së me partnerët e saj aziatikë dhe mesdhetarë për bashkëpunim”, tha ai.
Në të njëjtën kohë, ministri Hasani solli në vëmëndje dhe ngjarjet në veri të Kosovës, për të cilat tha se bëhet fjalë për të njëjtën dorë që tenton të dobësojë dhe rolin e OSBE. Ai theksoi se kërcënimet e vjetra kanë pllakosur rajonin dhe po tentojnë të ngrenë kokë, duke tentuar të zhvendoset vëmëndja edhe nga lufta në Ukrainë.
“Në Ballkanin Perëndimor, në rajonin tonë në tërësi dhe në shumë nga vendet tona individuale, ne e dimë se çfarë impakti pozitiv mund të ketë një OSBE e fortë. Ne e dimë gjithashtu se sot nevojitet edhe një herë një OSBE e fortë. Sepse pavarësisht progresit të dekadave të kaluara, kërcënimet e vjetra që kanë pllakosur historinë e rajonit tonë po ngrenë sërish kokën.
Dhe përsëri, pas këtyre përpjekjeve për të nxitur telashe në Ballkanin Perëndimor mund të dallojmë të njëjtën dorë që po përpiqet të dobësojë OSBE-në. Ngjarjet në Kosovë janë provë e qartë e përpjekjes për të tërhequr vëmendjen nga lufta në Ukrainë, duke nxitur konfliktin në Ballkanin Perëndimor.
Ne po bëjmë çmos për t’iu kundërvënë këtyre kërcënimeve së bashku me aleatët dhe partnerët tanë. Shqipëria vazhdon të punojë fort dhe në mënyrë proaktive për një Ballkan Perëndimor të qëndrueshëm dhe paqësor. Ne mbetemi garantues të orientimit evropian të rajonit tonë, i sigurisë, stabilitetit dhe demokracisë”, shtoi ai.
Ai përsëriti dhe njëherë nevojën për dialog mes Kosovës e Serbisë si e vetmja formë për zgjidhjen e tensioneve mes dy vendeve, por bëri thirrje edhe për njohjen e sovranitetit të shtetit demokratik të Kosovës.
