Një banesë 1 katëshe u shkrumbua nga flakët e zjarrit në lagjen “Guerrile” në Shkodër.
Zjarri u përhap me shpejtësi, ndërsa fatmirësisht arriti të shpëtojë kryefamiljari 85 -vjeçar i cili gjendej i vetëm në banesë. Të parët që i erdhën në ndihmë ishin fqinjët e më pas shërbimi zjarrfikës dhe policia.
PAL TOMA, BANOR I ZONËS
Ishte ndërhyrje e vështirë , ai është edhe i moshuar , po çfarë nuk kishte mbledhur këtu.
Operacioni për shuarjen e flakëve zgjati për me shumë se 1 orë dhe drejtuesit e shërbimit zjarrfikës thonë se ndërhyrja u vështirësua për shkak të sendeve të vjetra që gjendeshin brenda.
MUHAMET SMAJLI SHEF I SEKTORIT TË PARANDALIMIT
Ne jemi lajmëruar në 8 e 51 minuta, banesa kishte shumë materiale të djegshme dhe kjo na i vështirësoi shumë punën.
Mbërritja në kohë e zjarrfikësve në vendin e ngjarjes vështirësohet edhe për shkak të mungesës së adresave.
MUHAMET SMAJLI SHEF I SEKTORIT TË PARANDALIMIT
“ Edhe gjetja e shtëpisë ishte e vështirë , sepse kishte shumë rrugë të ndryshme, shumica të marrin në telefon, por nuk e japin adresën e saktë.
Dyshohet se zjarri ka rënë për shkak të një shkëndije elektrike.
