I futur në ndihmë të forcave të RENEA-s në ujërat e Lumi Osum, për kërkimet e 42-vjeçarit Ilir Kurti, Xhuljano Kaloti, 22 vjeç nga Berati, ka mbetur i bllokuar në ujë që prej mesditës së sotme. Operacionet për nxjerrjen e tij nga zona ku ka ngecur kanë rezultuar të pasuksesshme deri më tani.
Sipas informacioneve nga banorë të Skraparit, incidenti ka ndodhur gjatë kërkimeve në Kanionet e Osumit për gjetjen e trupit të 42-vjeçarit, i cili dyshohet se u hodh në lumë mbrëmjen e 19 shkurtit.
Lexo edhe :
Related Posts
Burimet bëjnë me dije se gjatë lundrimit me kanoe, njëra prej gomoneve është përmbysur për shkak të rrjedhës së fortë të ujit. Si pasojë, 22-vjeçari ka mbetur i bllokuar mes shkëmbinjve në zonën e quajtur “Ngushtica e tretë”, në hyrje të një shpelle.
Ai vijon prej orësh të qëndrojë në ujë. Edhe pse është kërkuar ndërhyrja me helikopter për nxjerrjen e tij me litar, deri tani nuk ka mbërritur asnjë mjet ajror në zonë. Temperaturat e ulëta dhe uji i akullt në kanione përbëjnë rrezik serioz për jetën e 22-vjeçarit.
Mësohet se në vendngjarje ndodhen vetëm banorë të zonës, të cilët po përpiqen ta ndihmojnë duke hedhur litar nga lart, pasi shërbimi zjarrfikës e ka pasur të pamundur të ndërhyjë për shkak të terrenit të vështirë. Deri më tani, nxjerrja e tij nga uji ka qenë e pamundur.
Kanioni i Osumit ka një gjatësi rreth 12 kilometra dhe thellësi që arrin deri në 90 metra. Në kushte të prurjeve të larta, ndërhyrja në këtë zonë paraqet rrezik maksimal, veçanërisht për persona të pastërvitur.
