Inspektorati Shtetëror i Mbikëqyrjes së Tregut në një njoftim zyrtar bën me dije se pajisja që i mori jetën 17-vjeçarit, Antonio Deliaj, një natë më parë në një lokal nate në Sarandë, nuk është një ashensor standardet ligjore. Pajisja me të cilën transportoheshin mallrat ishte e përshtatur për të kryer këtë proces, por sipas ISHMT nuk bëhet fjalë për një ashensor të mirëfilltë.
“Pajisja e përshtatur për transport mallrash nga subjekti, e cila ka pësuar defekt nuk është ashensor. Si rrjedhojë, ISHMT nuk ka kryer inspektime apo kontrolle pranë këtij subjekti, bazuar kjo në detyrimin e përputhshmërisë së instalimit të vendosur në shërbim nga personi përgjegjës, pasi nuk është brenda kompetencës ligjore të tij”, thuhet në njoftim.
Ngjarja e rëndë ndodhi rreth një orë pas mesnatës së të shtunës dhe shkak për aksidentin fatal ishte këputja e kavos së pajisjes, që përdorej për furnizimin e lokalit.
Në momentin kur gjeti vdekjen, i riu ka qenë duke marrë disa koli me ujë në bodrumin e barit, ndërsa sapo ka hyrë në ashensor, një nga kavot horizontale të tij është këputur duke e goditur në kokë. Për pasojë 17-vjeçari humbi jetën menjëhere.
Burimet thanë se kamarieri, një i afërm i pronarit të lokalit, ishte nga fshati Gjashtë i Sarandës.
Ndërkohë, policia e Sarandës ka arrestuar 43- vjeçarin, Lulëzim Allkushi si përgjegjës për montimin e ashensorit, ndërsa shpalli në kërkim pronarin e lokalit më të madh të qytetit bregdetar, 37- vjeçarin, Spiro Iljadhi.
