Mbi 100 persona kanë humbur jetën si pasojë e një stuhie vdekjeprurëse që ka përfshirë shtetet veriore të Indisë. Dhjetëra të tjerë janë lënduar, pasi shirat e rrëmbyeshëm, rëra dhe erërat e fuqishme, shkaktuan shkuljen e pemëve, shembjen e qindra shtëpive dhe rrëzimin e shtyllave elektrike.
Qeveria ka shpallur gjendjen e jashtëzakonshme në tre rajone, përfshirë edhe zonën Agra ku ndodhet monumenti i Taxh Mahalit. Autoritetet shprehen se stuhitë janë të zakonshme në këtë stinë, por ato kurrë nuk kanë shkaktuar një dëm kaq të madh. Zyrtaret japin alarmin se numri i viktimave mund të rritet, pasi stuhia ka goditur edhe kryeqytetin e Indisë.
