Prokuroria e Tiranë ka lëshuar masa sigurie për 8 persona, nga të cilët 5 zyrtarë të Bashkisë Tiranë dhe inspektorë të IMT-së, të dyshuar për dëmtim të buxhetit të shtetit përmes punimeve fiktive dhe dokumenteve të falsifikuara.
Mes të arrestuarve dhe atyre me detyrim paraqitjeje janë: Aurel Çuko, A.B, Eleana Guçe, Rexhina Rakipi, Sokol Qehajaj, Aleksandra Muhametllari, Shyqyri Maloku dhe Fatmir Firi, mëson gazetarja e Vizion Plus, Blerina Cene.
Bëhet fjalë për shembjen e pallateve nën zonën e Kombinatit në kuadër të procesit të rindërtimit. Hetimet nisën pas denoncimit të qytetarit që pallati i tij u shemb nga IMT në janar 2021 pa njoftim zyrtar.
Ndërkohë Prokuroria zbuloi se në janar 2021 janë shembur 6 objekte nga Bashkia Tiranë, përfshirë pallatin nr.140, ndërsa në mars Këshilli Bashkiak miratoi fond për demolimin e 15 pallateve, përfshirë edhe ato që tashmë ishin shembur duke rezultuar në krijimin e dokumentacionit të rremë.
Hetimet zbuluan se kompanitë fituese të tenderit përfshinë punime të rreme dhe dokumente të falsifikuara, duke shkaktuar dëm financiar në buxhetin e Bashkisë Tiranë.
“Nga hetimet mbi procedimin penal nr.2505 të vitit 2021, nisur nga denoncimi i shtetasit A.Xh për prishjen nga IMT të pallatit të tij, pa njoftim e pa vendim zyrtar, Prokuroria pranë Gjykatës së Shkallës së Parë të Juridiksionit të Përgjithshëm, Tiranë në bashkëpunim me Seksionin e Krimit Ekonomik në Drejtorinë e Policisë Tiranë, provoi se në Janar 2021 janë shembur 6 objekte nga Bashkia Tiranë, duke përfshirë edhe pallatin nr.140 që ishte objekti i hetimit. Ndërsa në mars 2021, nga ana e Këshillit Bashkiak u miratua fondi për “Demolimin dhe evadimin e mbetjeve ndërtimore” për 15 pallate duke përfshirë dhe objektet e demoluara më parë që në muajin janar nga Bashkia Tiranë”, thuhet në njoftim.
Sipas njoftimit, zyrtarët e lartë të Emergjencave Civile kanë firmosur dokumente të pavërteta, duke konsumuar veprat penale të falsifikimit dhe shpërdorimit të detyrës.
“Sipas Prokurorisë, përfaqësuesja e subjekteve “Arb&Trans-2010” sh.p.k dhe “Klajger Konstruksion” sh.p.k, së bashku me mbikëqyrësin e punimeve, kanë përfshirë në dokumentacion edhe objekte të demoluar më herët, duke paraqitur rrethana të rreme dhe duke shkaktuar dëm financiar përmes disbursimit të fondeve publike për punime fiktive. Po ashtu, hetimet kanë provuar se disa punonjës të IMT-së kanë hartuar preventivë pa kryer verifikime në terren, ndërsa drejtues të Drejtorisë së Emergjencave Civile janë përfshirë në hartimin dhe nënshkrimin e dokumenteve të pavërteta”, thuhet në njoftim.
Masat e sigurisë ndaj personave nën hetim:
“Arrest në shtëpi” për shtetasin A.Ç., Drejtor i Përgjithshëm i Emergjencave Civile, për kryerjen e veprave penale “Shpërdorim detyre” dhe “Falsifikimi i dokumenteve” kryer në bashkëpunim me shumë se një herë;
“Arrest në shtëpi” për shtetasin A.B., Drejtori i Drejtorisë së Emergjencave Civile, për kryerjen e veprave penale “Shpërdorim detyre” dhe “Falsifikimi i dokumenteve” kryer në bashkëpunim më shumë se një herë;
“Detyrim paraqitje” për shtetasen E.G., Përgjegjese e Sektorit të Politikave të Kompesimit nga Fatkeqësitë natyrore tëDrejtorisë së Emergjencave Civilepër kryerjen e veprës penale “Falsifikimi i dokumenteve” kryer në bashkëpunim me shumë se një herë;
“Detyrim paraqitje” për shtetasen R.R., Specialiste e IMT, për kryerjen e veprës penale “Shperdorimi detyre”;
“Arrest në shtëpi” për shtetasin S.Q. Specialist i IMT, bashkia Tiranë, për kryerjen e veprës penale “Shpërdorimi i detyrës”;
“Detyrim paraqitje” për shtetasen A. M., mbikëqyrëse e punimeve, përfaqësuese e BOE “Maging shpk & Imes-D shpk” për kryerjen e veprës penale “Falsifikimi i dokumenteve” kryer në bashkëpunim me shume se nje herë;
‘Detyrim paraqitje’ për shtetasin Sh.M., përfaqësues ligjor i BOE “Arb & Trans-2000” shpk dhe “KLAJGER Konstruksion” shpk dhe Adminstrator i Subjektit “Arb & Trans -2000” shpk, për kryerjen e veprës penale “Falsifikimi i dokumenteve” kryer në bashkëpunim më shumë se një herë; dhe
‘Detyrim paraqitje’ për shtetasin F.F., përfaqësues ligjor i BOE “Arb & Trans -2000” shpk dhe “KLAJGER Konstruksion” shpk për kryerjen e veprës penale “Falsifikimi i dokumenteve” kryer në bashkëpunim me shumë se një herë.
