Nuk ka rendësi sesa kushton, e rëndësishme është të jesh në listën e preferencave të Pep Guardioles. Për të te tjerat mendojnë sheikët që financojnë ekipin e njohur anglez. Për Manchester Cityn nuk ka asgjë të pamundur në merkato dhe “qytetaret” po e tregojnë këtë gjë edhe gjatë këtyre ditëve. Goditja e radhës, por jo e fundit, ka qenë Danilo Luiz, mbrojtësi brazilian që nuk arriti dot të shkëlqente tek Real Madrid e që me transferimin tek Manchester City shpreson të rikthehet ne kohërat kur luante me Porton.
30 milion euro shkojnë ne arkat e klubit madrilen. Edhe pse jo ende zyrtare, mund të konsiderohet e përfunduar edhe marrëveshja për Mendy nga Monaco, i cili do t’i kushtoje skuadrës angleze 58 milion euro. Lumë parash që po tronditin merkaton e futbollit të klubeve, pavarësisht se për pronaret arabe të këtij klubi janë shpenzime normale për ta parë krijesën e tyre në nivelet më të larta, aq më tepër kur këto shpenzime i kërkon një trajner si Pep Guardiola.
Spanjolli erdhi vitin e kaluar tek The Citizens, por revolucionin e vërtete po e bën tani, pasi ka spastruar thuajse 80% të ekipit të sezonit të kaluar. Përveç Danilos dhe Mendi që në total kanë kushtuar 88 milion euro, duhet të shtojmë këtu edhe blerjen e portierit Ederson Moraes nga Benfica për 40 milion euro apo edhe te Bernardo Silves për 50 milion euro dhe në mënyre të veçante mbrojtësit të djathte, Kyle Walker për 56 milion euro nga Tottenham.
Nuk duhet nënvlerësuar edhe talenti Douglas Luiz i paguar 12 mln euro tek Vasko de Gama në Brazil. Manchester City është skuadra që ka harxhuar më shumë para në historinë e klubeve për repartin e mbrojtjes, ndërsa deri tani në merkaton e kësaj vere nga paratë e familjes mbretërore Mansour te Emirateve te Bashkuara Arabe janë harxhuar 206 milion euro, nje shume krejtësisht e papërfillshme për një nga familjet më të pasura në botë.
