“Nuk ka informacione që të mbështesin pretendimet e presidentit Trump se paraardhësi Obama ka urdhëruar përgjimin e tij”. Kështu deklaroi drejtori i FBI, James Comey përpara komisionit për Shërbimet e Zbulimit në Dhomën e Përfaqësuesve.
“Nuk kam informacione që të mbështesin ato që Trump ka shkruar në Twitter. Departamenti i Drejtësisë dhe FBI nuk kanë të dhëna për të mbështetur akuzat. FBI po heton në mënyrë aktive përpjekjet ruse për të ndërhyrë në zgjedhjet amerikane, përfshirë ndonjë koordinim të mundshëm me fushatën e Trump”.
Comey tha se asnjë president nuk mund të urdhërojë operacione përgjimi ndaj askujt. Ai shpjegoi se FBI po heton natyrën e lidhjeve mes individëve të afërt me fushatën e Trump dhe qeverisë ruse dhe nëse ka pasur koordinim mes fushatës dhe përpjekjeve të Rusisë, ndërsa tha se Rusia donte të dëmtonte demokracinë amerikane, të dëmtonte Clintonin dhe të ndihmonte Trumpin.
Përpara komisionit të Kongresit doli edhe shefi i Agjencisë së Sigurisë Kombëtare, NSA, Admirali Michael Rogers. Rogers mohoi akuzat e Trump se ai u kishte kërkuar shërbimeve britanike të inteligjencës ta përgjonin.
Seanca dëgjimore ne komisionin e zbulimit ishte e hapur per mediat dhe publikun, gje qe ndodh per here te pare per shkak te ndjeshmërisë se çështjes.
