Konflikti në rritje midis dy ekonomive më të mëdha në botë ka tronditur tregjet dhe kompanitë, të cilat i frikësohen ndërprerjes së zinxhirëve të tyre të furnizimit global. Shtëpia e Bardhë kërcënoi Kinën me vendosjen e tarifave të reja që arrijnë një vlerë prej 200 miliardë dollarësh.
“Duhet të ndërmerren masa të mëtejshme për të inkurajuar Kinën që të ndryshojë praktikat e saj të padrejta, të hapë tregun e saj për mallrat tona dhe të pranojë një marrëdhënie më të balancuar tregtare me Shtetet e Bashkuara”.
Administrata Trump ka paralajmëruar se do të vendosë edhe një tarifë prej 25% në 50 miliardë dollarë ndaj eksporteve kineze. Kina, duke pretenduar se Shtetet e Bashkuara kishin “nisur një luftë tregtare”, u hakmor menjëherë, duke përcaktuar tarifat e veta mbi mallrat e SHBA me vlerë 50 miliardë dollarë.
Ministria kineze e Tregtisë reagoi ndaj Trump, duke akuzuar Shtetet e Bashkuara për “presion ekstrem dhe premtoi se do të hakmerrej ashpër.
“Duke kryer një luftë tregtare, Shtetet e Bashkuara kanë shkelur ligjin e tregut dhe janë në kundërshtim me trendin e zhvillimit të botës së sotme. Kina ka nisur kundërmasat për ruajtjen dhe mbrojtjen e interesave të vendit dhe të popullit, si dhe sistemin e tregtisë së lirë dhe interesat e përbashkëta të njerëzimit.” tha një zëdhënës i ministrisë se tregtisë kineze.
Por analistët thonë se është e paqartë se kush do të tërhiqet nga konfrontimi.
