Presidenti i Ukrainës, Volodimir Zelensky, deklaroi se Shtetet e Bashkuara kanë vendosur një afat deri në muajin qershor për arritjen e një marrëveshjeje që do t’i japë fund luftës mes Ukrainës dhe Rusisë. Nëse ky afat nuk respektohet, administrata e presidentit amerikan Donald Trump pritet të ushtrojë presion ndaj të dyja palëve për të arritur një marrëveshje.
“Amerikanët propozojnë që lufta të përfundojë deri në fillim të verës dhe ka shumë gjasa që presioni të ushtrohet pikërisht mbi këtë bazë kohore”, deklaroi Zelensky të premten për gazetarët, sipas agjencisë Associated Press.
Ai shtoi se SHBA kërkojnë një kalendar të qartë për të gjitha fazat e procesit të paqes, duke theksuar se “duan që gjithçka të përfundojë deri në qershor”.
Takime të reja trepalëshe javën e ardhshme
Zelensky njoftoi gjithashtu se SHBA kanë propozuar që raundi i radhës i bisedimeve trepalëshe të zhvillohet javën e ardhshme, për herë të parë në territorin amerikan, me shumë gjasa në Miami. “Ne e kemi konfirmuar pjesëmarrjen tonë”, tha ai.
Ky takim i ri vjen pas bisedimeve trepalëshe të mbajtura në Abu Dhabi me ndërmjetësimin e SHBA-së, të cilat nuk sollën përparim për shkak të qëndrimeve të papajtueshme të palëve.
Rusia vazhdon të ushtrojë presion ndaj Ukrainës për t’u tërhequr nga rajoni i Donbasit, ku luftimet mbeten intensive. Megjithatë, Kievi ka bërë të qartë se nuk do ta pranojë këtë kusht.
Në fund, Zelensky theksoi se Ukraina nuk do të pranojë asnjë marrëveshje midis SHBA-së dhe Rusisë që arrihet pa pjesëmarrjen e saj./vizionplus.tv
