SHBA dhe Rusia vijojnë të përplasen për çështjen e diplomatëve. Zëdhënësja e Departamentit Amerikan të Shtetit, Heather Nauert ftoi Moskën që të mos sillej si viktimë dhe paralajmëroi se nuk do të qëndronin duarkryq.
Administrata Trump nuk e ka mirëpritur aspak vendimin e Moskës për të shpallur “non grata” 60 diplomatë amerikanë dhe mbylljen e Konsullatës së SHBA në Shën Peterburg. Në një reagim pas kundërpërgjigjes ruse, zëdhënësja Nauert tha se nuk ka asnjë justifikim për dëbimin e diplomatëve amerikanë.
Ministri i Jashtëm, Sergei Lavrov tha se diplomatet kane afat te largohen deri me date 5 prill me pretendimin se veprimet e tyre nuk përputhen me statusin diplomatik. Lavrov paralajmëroi një ditë më parë se do të kundërpërgjigjeshin ndaj secilit vend që mori masa kundër Moskës, duke larguar po aq diplomatë. Nëse Rusia do të shkojë përpara me këto masa, pritet që të dëbojë 150 diplomatë nga 22 shtete në total.
Rasti Skripal ka shkaktuar kështu një dëbim masiv diplomatik, i pari dhe më i madhi në histori. Fushatës iu bashkua edhe Shqipëria, e cila, pasi thirri ambasadorin rus në Tiranë, Aleksandër Karpushin, urdhëroi largimin e dy diplomatëve: Sekretari i Parë i ambasadës, Aleksey Balashov dhe Vladislav Filippov, atashe ushtarak.
Ndërsa detaje të reja kanë dalë nga hetimet në Salisbury, ku është zbuluar se Sergei Skripal dhe vajza e tij janë helmuar në derën e shtëpisë së tyre. Ky fakt hedh poshtë mundësinë e helmimit të 130 personave të tjerë që gjendeshin në restorantin ku darkuan Skripal dhe vajza e tij.
