I dërguari special i SHBA për Ballkanin perëndimor , Matthew Palmer i bën thirrje Bashkimit Europian të marrë një vendim pozitiv për negociatat me Shqipërinë dhe Maqedoninë e Veriut jo në samitin e Zagrebit në muajin maj, por dy muaj më herët.
Zyrtari i lartë amerikan për mediat greke deklaroi se vendimi për të dyja vendet duhet te merret përpara zgjedhjeve të parakohshme ne Maqedoninë e Veriut.
MATTHEW PALMER
I DERGUARI SPECIAL I SHBA PER BALLKANIN
BE-ja duhet të shkojë me shpejtësi drejt Këshillit Europian të muajit mars të vitit të ardhshëm përpara zgjedhjeve në Maqedoninë e Veriut për të marrë një vendim pozitiv, sepse Samiti BE-Ballkan Perëndimor në Zagreb në maj 2020 është informal dhe nuk mund të marrë ndonjë vendim.
Palmer u shpreh se Uashingtoni është i angazhuar në këtë drejtim dhe për shtetet e bashkuara mos hapja e negociatave ka kosto të mëdha strategjike, raporton Vizion Plus.
MATTHEW PALMER
I DERGUARI SPECIAL I SHBA PER BALLKANIN
Ajo që më intereson më shumë është se Ballkani Perëndimor mund të humbasë interesin për integrimin europian. Uashingtoni do të punojë për të qëndruar i hapur për perspektivën europiane të vendeve në rajon. Ne jemi në komunikim të vazhdueshëm, në nivele të shumëfishta, si me kryeqytetet europiane, ashtu edhe me institucionet e tyre. Ajo që po bëjnë SHBA-të është paraqitja e “kostos strategjike” të moshapjes së negociatave të pranimit.
Ndërkohë ne 19 nëntor Bashkimi Europian do te rinise diskutimin për zgjerimin e Unionit dhe fatin e Shqipërisë e Maqedonisë se Veriut qe presin hapjen e negociatave të anëtarësimit.
Burime për Vizion Plus bëjnë me dije se ne takimin e ministrave te jashtëm do te diskutohet rreth metodologjisë se re te zgjerimit të propozuar nga Franca dhe të konsultuar me Berlinin zyrtar.
Ende nuk ka detaje, por mësohet se qëllimi është qe te përgatitet materiali për samitin e Zagrebit ne maj 2020, ose për një samit qe mund te zhvillohet me herët./ Gerta Banushi
