Pavarësisht ngërçit në Kongres, administrata e Joe Biden dje, të martën, ripohoi mbështetjen e saj për Ukrainën duke njoftuar për ndihmë të re ushtarake për Kievin, ndërsa presidenti amerikan u takua me presidentin dhe kryeministrin polak në Shtëpinë e Bardhë.
“Ne duhet të veprojmë përpara se të jetë fjalë për fjalë tepër vonë. Sepse, siç mund ta kujtojë Polonia, Rusia nuk do të ndalet në Ukrainë”, tha Biden teksa mirëpriti homologun e tij polak Andriy Duda dhe kryeministrin polak Donald Tusk në Shtëpinë e Bardhë.
“Ne nuk duhet të lejojmë që imperializmi rus të prishë stabilitetin dhe ekzistencën paqësore të Evropës”, theksoi ai pas takimit të tij me Dudën.
Ndërkohë SHBA miratoi një kontratë për t’i shitur pajisje ushtarake Polonisë aleate të NATO-s, e cila i siguron Varshavës raketa ajër-tokë me rreze të gjatë dhe raketa ajër-ajër me rreze të mesme veprimi për 3.5 miliardë dollarë.
Më herët dje, Uashingtoni njoftoi ofrimin e 300 milionë dollarëve në ndihmë të re ushtarake për Ukrainën, një shumë shumë më e ulët se ajo që Biden ka kërkuar prej muajsh.
Kjo ndihmë përfshin kryesisht raketa kundërajrore, municione dhe mortaja për artilerinë dhe u përgjigjet”disa nevojave emergjente të Ukrainës, theksoi Jake Sullivan, këshilltar i presidentit amerikan.
“Kjo është një sasi relativisht e vogël ndihme që synon t’i sigurojë Ukrainës minimumin e nevojshëm për një periudhë të shkurtër kohore”, shtoi një zyrtar i lartë amerikan. /vizionplus.tv
