Të paktën 26 persona mbetën të vrarë dhe dhjetëra të tjerë u plagosën, pasi një person i armatosur hapi zjarr gjatë meshës së të dielës në një kishë në Teksas.
Mes të vdekurve janë edhe 8 anëtarët e një familjeje, përfshirë fëmijë të moshës 5 vjeç si dhe të moshuar.
Agresori i identifikuar nga policia si Devin Patrick Kelley, 26 vjeç, hapi zjarr në ambientet para kishës, duke lënë të vdekur menjëherë 23 persona dhe më pas hyri brenda. Një qytetar nxori armën e tij në përpjekje për të qëlluar mbi agresorin, por Devin arriti të largohej nga vendi i ngjarjes.
Ai u gjet më pas i vrarë në makinën e tij, disa kilometra larg kishës. Sipas policisë, agresori ishte i veshur me të zeza dhe mbante jelek antiplumb. Pas kontrollit, në automjetin e tij u gjetën edhe armë të tjera.
Ende nuk është e qartë nëse 26 vjeçari vrasës është vetëvrarë apo ka ndërruar jetë, si pasojë e plagëve të marra nga të shtënat.
Mediat shkruajnë se i riu ishte shkarkuar nga forcat ajrore në vitin 2014, pas një gjyqi ushtarak për dhunë ndaj bashkëshortes dhe fëmijës së tij.
Por ajo që e komplikon më tepër gjetjen e motivit që e shtyu të riun të ndërmerrte një hap të përgjakshëm, është se agresori kishte qenë gjithashtu një mësues i studimit të shkrimeve të Biblës.
Por faqja e tij në Facebook tregon gjithashtu se ai ishte i fiksuar pas armëve.
Masakra në Kishën e Parë Baptiste, është më e madhja e këtij lloji në shtetin amerikan që nuk ka ende një motiv të qartë. Ndërkohë, FBI po heton nëse ka persona të tjerë të implikuar në ngjarjen e rëndë që tronditi Teksasin këtë të diele.
