Pas urdhrit ekzekutiv për ndalimin përkohësisht të vizave për 6 vende muslimane që solli kritika dhe protesta, administrata Trump shpalli disa kritere të reja për aplikantët për viza nga këto shtete. Aplikuesit duhet të kenë lidhje të ngushta familjare apo biznesi në SHBA. Nga këto rregulla preken qytetarët nga Irani, Libia, Siria, Somalia, Sudani dhe Jemeni.
Person me lidhje të ngushtë konsiderohet prindi, bashkëshorti, fëmija, nusja, dhëndri, por përjashtohen gjyshërit, hallat apo nipat. Ky vendim erdhi pasi Gjykata e Lartë amerikane i dha një fitore të pjesshme Trumpit, duke lejuar pjesë të urdhrit të tij për rishikimin e ndalimit të udhëtimeve.
Sipas gjykatës, do të ndalohet udhëtimi për personat që nuk kane asnjë lidhje me SHBA-në.Kjo cështje do të shqyrtohet përfundimisht nga gjykata supreme në muajin tetor, ndërsa gjykata të tjera më të vogla e kanë bllokuar urdhrin. Ai ndalon dhënien e vizave për udhëtarët nga vendet muslimane për 90 ditë dhe pezullon programin për refugjatët për një periudhe 4 mujore. Trump e argumentoi urdhrin me nevojën për të ndalur hyrjen e terroristëve ne SHBA, por kritikët e shohin atë si ndalim ndaj muslimanëve.
