SHBA: Kina kërcenim për rajonin
Gjatë samitit të Sigurisë të mbajtur në Singapor, Sekretari amerikan i Mbrojtjes James Mattis, duke folur për denuklearizimin e gadishullit Korean, tha se Pekini është kthyer në një kërcënim për fqinjët pasi ka dërguar pajisje ushtarake në Detin e Kinës Jugore.
Sipas tij, veprimet e Kinës po ngrenë pikëpyetje mbi objektivat për zgjerim të ndikimit të tij.
“Shtetet e Bashkuara dëshirojnë denuklearizimin e plotë të gadishullit Korean. Pavarësisht se Kina pretendon të kundërtën, vendosja e këtyre sistemeve të armatimeve është e lidhur drejtpërdrejt me përdorime ushtarake me qëllim frikësimin dhe kërcënimin”
Mattis gjithashtu u shpreh se presidenti amerikan Donald Trump, kërkon një marrëdhënie konstruktive me Kinën, pasi e pranon rolin e saj të rëndësishëm në rajon.
Sekretari Amerikan i Mbrojtjes foli edhe për çështjen e 28.500 trupave amerikane në Korenë e Jugut, por tha se një çështje e tillë nuk do të jetë në fokusin e bisedimeve mes presidentit amerikan dhe udhëheqësit të Koresë së Veriut, Kim Jong-Un.
Edhe ministri i Mbrojtjes i Koresë së Jugut, u shpreh se prania e forcave amerikane është krejtësisht e ndarë nga çështja bërthamore e Koresë së Veriut.
